ഇന്തോനേഷ്യന്‍ ഓപ്പണ്‍ ലക്ഷ്യ, കിഡംബി മുന്നോട്ട്

ജക്കാര്‍ത്ത: ഇന്തോനേഷ്യ ഓപ്പണ്‍ സൂപ്പര്‍ ബാഡ്മിന്റണ്‍ ചാമ്പ്യന്‍ഷിപ്പില്‍ ഇന്ത്യന്‍ താരങ്ങള്‍ മുന്നോട്ട്. ആദ്യ റൗണ്ടില്‍ വിജയിച്ച് ലക്ഷ്യ സെന്‍, കിഡംബി ശ്രീകാന്ത് എന്നിവര്‍ രണ്ടാം റൗണ്ടില്‍ കടന്നു. മറ്റൊരുതാരമായ പ്രിയാന്‍ഷു രജാവതിന് രണ്ടാം റൗണ്ടിലേക്ക് വാക്കോവര്‍ ലഭിച്ചു. അതേസമയം വനിതാ സിംഗിള്‍സില്‍ ആകര്‍ഷി കശ്യപ് ആദ്യ റൗണ്ടില്‍ തോറ്റ് പുറത്തായി.  

ലക്ഷ്യ സെന്‍ ആദ്യ റൗണ്ടില്‍ എട്ടാം സീഡ് മലേഷ്യയുടെ ലീ സി ജിയയെ നേരിട്ടുള്ള ഗെയിമുകള്‍ക്ക് പരാജയപ്പെടുത്തിയാണ് രണ്ടാം റൗണ്ടിലേക്ക് മുന്നേറിയത്. 53 മിനിറ്റ് നീണ്ട പോരാട്ടത്തിനൊടുവില്‍ 21-17, 21-13 എന്ന സ്‌കോറിനായിരുന്നു ഇന്ത്യന്‍ താരം ലക്ഷ്യയുടെ അനായാസ വിജയം.

മറ്റൊരു മത്സരത്തില്‍ കെ. ശ്രീകാന്ത് ചൈനയുടെ ലു ഗ്വാങ്ഷുവിനെ നേരിട്ടുള്ള ഗെയിമുകള്‍ക്ക് തറപറ്റിച്ചു. 46 മിനിറ്റ് നീണ്ട മത്സരത്തില്‍ 21-13, 21-19 എന്ന സ്‌കോറിനായിരുന്നു ശ്രീകാന്തിന്റെ വിജയം. രണ്ടാം റൗണ്ടില്‍ ലക്ഷ്യ സെന്നാണ് ശ്രീകാന്തിന്റെ എതിരാളി. വനിതാ സിംഗിള്‍സില്‍ രണ്ടാം സീഡ് ദക്ഷിണ കൊറിയയുടെ ആന്‍ സി യങ്ങിനോട് 21-10, 21-4 എന്ന നേരിട്ടുള്ള ഗെയിമുകള്‍ക്ക് പരാജയപ്പെട്ടാണ് ആകര്‍ഷി കശ്യപ് ആദ്യ റൗണ്ടില്‍ മടങ്ങിയത്.