മാവേലിക്കര: എപ്പോഴും പുഞ്ചിരിതൂകി അയല്ക്കാരുമായി നല്ല സൗഹൃദത്തിലായിരുന്ന ഒരു പിഞ്ചുകുഞ്ഞ് അപ്രതീക്ഷിതമായി പിതാവിന്റെ കരാളഹസ്തത്താല് കൊല്ലപ്പെട്ട വാര്ത്ത കേട്ട് നടുങ്ങിവിറച്ചിരിക്കുകയാണ് മാവേലിക്കരയ്ക്കടുത്തുള്ള പുന്നമൂടെന്ന ഗ്രാമം. പുന്നമൂട് ആനക്കൂട്ടില് ശ്രീധന്യയില് ശ്രീമഹേഷിന്റേയും പരേതയായ വിദ്യയുടേയും മകള് ആറുവയസുള്ള നക്ഷത്രയെ അയല്ക്കാര്ക്കെല്ലാം വളരെ ഇഷ്ടമായിരുന്നു. ചെറുപ്പത്തില്തന്നെ അമ്മ നഷ്ടപ്പെട്ട കുട്ടിയെന്ന പരിഗണനകൂടി കിട്ടിയിരുന്നു നക്ഷത്രയ്ക്ക്.
എന്നാല് മദ്യ ലഹരിയില് മനസു മരവിച്ച പിതാവിന്റെ കൈകളാല്തന്നെ നിഷ്ഠൂരമായി കൊലചെയ്യപ്പെട്ട് തന്റെ അമ്മയുടെ ലോകത്തേക്ക് ഒരു നക്ഷത്രമായി അവള്പോയി.
അതിനിടെ ശ്രീമഹേഷിനെ തെളിവെടുപ്പിനെത്തിച്ചപ്പോള് ജനങ്ങള് അക്രമാസക്തരായി. ഒടുവില് വളരെപാടുപെട്ടാണ് ജനങ്ങളെ ശാന്തരാക്കി പോലീസ് തെളിവെടുപ്പ് നടത്തിയത്.
മാവേലിക്കര സിഐ ശ്രീജിത്തിന്റെ നേതൃത്വത്തിലാണ് തെളിവെടുപ്പ് നടത്തിയത്. നാട്ടുകാരുടെ ഭാഗത്തുനിന്ന് ശക്തമായ പ്രതിഷേധമുയരുമെന്ന് സ്പെഷ്യല് ബ്രാഞ്ചിന്റെ നിര്ദ്ദേശത്തെ തുടര്ന്ന് വന്പോലീസ് സംവിധാനത്തിലാണ് തെളിവെടുപ്പ് നടത്തിയത്. വിരലടയാള വിദഗ്ദ്ധരും സ്ഥലത്തെത്തി തെളിവെടുപ്പ് നടത്തിയിരുന്നു.
മദ്യലഹരിയിലായിരുന്ന ഇയാള് ബുധനാഴ്ച രാത്രി 7.30യോടെയാണ് മൂര്ച്ചയേറിയ മഴുവിന് തന്റെ മകളെ വെട്ടികൊലപ്പെടുത്തിയത്. പ്രദേശത്ത് ആരുമായും വലിയ സഹകരണമില്ലാത്തയാളാണ് മഹേഷ്. നക്ഷത്രയുടെ സംസ്ക്കാരം വെള്ളിയാഴ്ച വൈകിട്ട് മൂന്നിന് അമ്മ വിദ്യയുടെ പത്തിയൂരിലെ വീട്ടില് നടക്കും.
