തൃശൂര്‍: വിവാഹ വീഡിയോകളില്‍ വ്യത്യസ്തത കൊണ്ടുവരാന്‍ ഏറെ ഇഷ്ടമുള്ളവരാണ് മലയാളികള്‍. വെറൈറ്റി വീഡിയോകള്‍ക്ക് പ്രോത്സാഹനം നല്‍കാറുമുണ്ട്. എന്നാലും ഇന്‍സ്റ്റാഗ്രാമില്‍ പോസ്റ്റ് ചെയ്ത റീല്‍ ഒരു മാസം തികയും മുമ്പേ 12 ലക്ഷം പേര്‍ കണ്ടുവെന്നത് അപൂര്‍വമാണ്. പാലക്കാട് ആലത്തൂര്‍ സ്വദേശിനി അര്‍ച്ചനയുടെ വിവാഹത്തോടനുബന്ധിച്ചെടുത്ത റീലാണ് ഇത്തരത്തില്‍ വൈറലായത്. 11 സഹോദരന്മാരുടെ ഏക സഹോദരിയാണ് കഥാനായിക. ഫോട്ടോഗ്രഫര്‍ സനോജ് കേശവിന്റെതാണ് ആശയം.
1997 ല്‍ പുറത്തിറങ്ങിയ അനിയത്തിപ്രാവ് എന്ന സിനിമയിലെ ‘അനിയത്തിപ്രാവിന് പ്രിയരിവര്‍ നല്‍കും ചെറുതരി സുഖമുള്ള നോവ്’ എന്ന പാട്ടിന് അനുസരിച്ച് സഹോദരങ്ങള്‍ സഹോദരിയെ തൊട്ടിലില്‍ എന്നവണ്ണം കൈകള്‍ ചേര്‍ത്തുപിടിച്ച് കിടത്തുന്നതാണ് രംഗം. പ്രമുഖരടക്കം വിളിച്ചും കമന്റ് ചെയ്തും അഭിനന്ദനം അറിയിച്ചതായി സനോജ് പറയുന്നു. പുതിയ പരീക്ഷണങ്ങള്‍ കൊണ്ടുവരാന്‍ ഇഷ്ടമുള്ള സനോജ് ഇതിന് മുമ്പ് ചെയ്ത ചില വര്‍ക്കുകളും വൈറല്‍ ആയിട്ടുണ്ട്.
ഏറെ കഷ്ടപ്പെട്ടാണ് സനോജ് ഈ നിലയിലെത്തിയത്. സുഹൃത്തുക്കള്‍, സാമൂഹിക മാധ്യമം എന്നിവ വഴിയാണ് പ്രോജക്ടുകള്‍ കിട്ടുന്നത്. കേരളത്തിലും പുറത്തും നിരവധി വര്‍ക്കുകള്‍ അദേഹത്തെ തേടി എത്തുന്നുണ്ട്. നാട്ടിലെ സ്റ്റുഡിയോകളില്‍ നിന്ന് വാടകയ്‌ക്ക് എടുത്ത ക്യാമറയുമായാണ് വര്‍ക്കുകള്‍ തീര്‍ക്കുക. പാലക്കാട് പുതിയങ്കം ആലത്തൂര്‍ സ്വദേശിയാണ്. അച്ഛനും അമ്മയും അടങ്ങിയതാണ് സനോജിന്റെ കുടുംബം.
അര്‍ച്ചനയുടെ വിവാഹത്തോടനുബന്ധിച്ചെടുത്ത റീലില്‍ നിന്നുള്ള രംഗം:
https://www.instagram.com/reel/CsOtb1WJyC7/?utm_source=ig_web_button_share_sheet
പ്രതികരിക്കാൻ ഇവിടെ എഴുതുക: