ന്യൂദല്‍ഹി: മകളെ റെസ്ലിങ് ഫെഡറേഷന്‍ ഓഫ് ഇന്ത്യ മുന്‍ അധ്യക്ഷന്‍ ബ്രിജ് ഭൂഷണ്‍ ശരണ്‍ സിങ് ലൈംഗികമായി പീഡിപ്പിച്ചിട്ടില്ലെന്ന് പ്രായപൂര്‍ത്തിയാകാത്ത പരാതിക്കാരിയുടെ പിതാവ്. താനും മകളും ബ്രിജ് ഭൂഷണെതിരേ വ്യാജ ആരോപണങ്ങളാണ് ഉന്നയിച്ചതെന്നും ഇയാള്‍ വെളിപ്പെടുത്തി.
ബ്രിജ് ഭൂഷന്റെ ഭാഗത്തുനിന്ന് തന്റെ മകള്‍ക്കെതിരേ പക്ഷപാതപരമായ സമീപനമുണ്ടായിട്ടുണ്ട്, എന്നാല്‍ ലൈംഗികമായി പീഡിപ്പിച്ചിട്ടില്ല. കഴിഞ്ഞ വര്‍ഷം ഏഷ്യന്‍ ചാംപ്യന്‍ഷിപ്പിനുള്ള ട്രയല്‍സ് ഫൈനലില്‍ മകള്‍ പരാജയപ്പെട്ടതിന്റെ ദേഷ്യത്തിലാണ് വ്യാജ ആരോപണം ഉന്നയിച്ചതെന്നും വിശദീകരണം.
പഴയ പരാതി പിന്‍വലിച്ചിട്ടില്ലെന്നും, എന്നാല്‍, പുതിയ മകളുടെ പുതിയ മൊഴി രേഖപ്പെടുത്തിയിട്ടുണ്ടെന്നും ഇയാള്‍ വ്യക്തമാക്കി. ”ട്രയല്‍സില്‍ ഡ്യൂട്ടിയിലുണ്ടായിരുന്ന ജീവനക്കാരെല്ലാം ഡല്‍ഹിക്കാരായിരുന്നു. ഫൈനലില്‍ മകളുടെ എതിരാളിയില്‍ ഡല്‍ഹിയില്‍നിന്നു തന്നെയായിരുന്നു. ഇതു നിയമവിരുദ്ധമാണ്. ഇതാണ് ബ്രിജ് ഭൂഷണോട് വിരോധം തോന്നാന്‍ കാരണം. ആരുടെയും നിര്‍ബന്ധമോ ഭീഷണിയോ കാരണമല്ല ഇപ്പോള്‍ മാറ്റി പറയുന്നത്”.
”ആരോപണങ്ങളില്‍ ചിലത് ശരിയാണ്, ചിലത് തെറ്റും. ഞാനൊരു പെണ്‍കുട്ടിയുടെ അച്ഛനാണ്. ഈ സംഘര്‍ഷത്തില്‍ തുടരാന്‍ എനിക്കു താത്പര്യമില്ല”, പരാതിക്കാരിയുടെ അച്ഛന്‍ വ്യക്തമാക്കി.
പ്രതികരിക്കാൻ ഇവിടെ എഴുതുക: