ലക്നൗ: ഹിന്ദു യുവതിയെ വിവാഹം കഴിച്ച ശേഷം മതംമാറ്റാനുള്ള ശ്രമം പരാജയപ്പെട്ടതോടെ ഗര്‍ഭിണിയായ യുവതിയെ വിഷം നല്‍കി കൊലപ്പെടുത്തിയ കേസില്‍ രണ്ട് യുവാക്കൾ അറസ്റ്റിലായി. മുഹമ്മദ് നവീദ്, ഫർഹാൻ ഖാൻ എന്നിവരാണ് അറസ്റ്റിലായത്.
മൂന്നാം പ്രതി മുസ്താഖിമിന് വേണ്ടി തിരച്ചില്‍ തുടരുന്നു. ഉത്തർപ്രദേശിലെ ഷാജഹാൻപൂരിലാണ് ‘കേരള സ്റ്റോറി’ മാതൃകയില്‍ ലവ് ജിഹാദ് അരങ്ങേറിയത്. ലഖിംപൂർ ജില്ലയിലെ പാലിയ സ്വദേശിയായ സീമ ഗൗതം എന്ന ദളിത് യുവതിയ്‌ക്കാണ് ദാരുണാന്ത്യം. മുഹമ്മദ് നവീദ് താന്‍ ഹിന്ദുവാണെന്ന് പറഞ്ഞ് 23 കാരിയെ പ്രണയക്കെണിയില്‍ വീഴ്‌ത്തുകയായിരുന്നു. തുടർന്ന് ഒരു സ്വകാര്യ കണ്ണാശുപത്രിയിൽ ജോലി ചെയ്യുന്ന സീമ ഗൗതമും മുഹമ്മദ് നവീദും ലിവിംഗ് ടുഗദര്‍ മാതൃകയില്‍ ജീവിക്കാന്‍ തുടങ്ങി. ഇതിനിടയിൽ യുവതി ഗർഭിണിയായി.
പ്രണയക്കെണിയെക്കുറിച്ചും മതംമാറ്റം നടക്കാതായപ്പോഴുള്ള അരുംകൊലയെക്കുറിച്ചും ഷജഹാന്‍പൂര്‍ പൊലീസ് വിശദീകരിക്കുന്നു:
അധികംവൈകാതെ നവീദ് യുവതിയുടെ സ്വകാര്യചിത്രങ്ങൾ കാണിച്ച് ഭീഷണിപ്പെടുത്തി ഇസ്ലാം മതം സ്വീകരിക്കാൻ നിർബന്ധിച്ചു തുടങ്ങി. സീമ ഗൗതമിന്റെ പേര് സോയ സിദ്ദിഖി എന്നാക്കി മാറ്റുകയും ചെയ്തു. എന്നാല്‍ സീമ ഇസ്ലാം മതം സ്വീകരിക്കാൻ വിസമ്മതിച്ചു. ഇതോടെ നവീദ് തന്റെ സുഹൃത്തുക്കളുടെ സഹായത്തോടെ വിഷം നൽകി കൊലപ്പെടുത്തി.
മെയ് 27 ശനിയാഴ്ച രാത്രിയോടെ വിഷം ഉള്ളിൽ ചെന്ന യുവതിയെയും കൊണ്ട് നവീദ് സുഹൃത്തുക്കളെയും കൂട്ടി ആശുപത്രിയിലെത്തിയെങ്കിലും മരിച്ചതായി ഡോക്ടർമാർ സ്ഥിരീകരിച്ചു. യുവതി 6 മാസം ഗർഭിണിയായിരുന്നു. ആശുപത്രിയില്‍ ഭാര്യയെ സോയ സിദ്ദിഖി എന്നാണ് ആദ്യം പരിചയപ്പെടുത്തിയത്. പിന്നീട് ആശുപത്രി അധികൃതര്‍ സംശയം തോന്നി കുത്തിക്കുത്തി ചോദിച്ചതോടെ സത്യം പുറത്തുവന്നു. നവീദിന്റെയും കൂട്ടരുടെയും പെരുമാറ്റത്തിൽ സംശയം തോന്നിയ ഡോക്ടർമാർ പോലീസിൽ വിവരമറിയിച്ചു. ഇതിനിടയിൽ യുവതിയുടെ മൃതദേഹം ബലമായി കൊണ്ടുപോകാൻ നവീദ് ശ്രമിച്ചെങ്കിലും അതിനിടയില്‍ പൊലീസെത്തി.
പിടിക്കപ്പെടുമെന്ന് ഉറപ്പായ നവീദും സുഹൃത്തുക്കളും ഓടി രക്ഷപ്പെടാൻ ശ്രമിക്കുന്നതിനിടെ പോലീസ് കസ്റ്റഡിയിലെടുക്കുകയായിരുന്നു.
പ്രതികരിക്കാൻ ഇവിടെ എഴുതുക: