ലണ്ടന്: സ്വന്തം തട്ടകത്തില് തകര്പ്പന് ജയവുമായി ന്യൂകാസില് യുണൈറ്റഡ്. ഇന്നലെ നടന്ന ബ്രൈറ്റണിനെതിരായ മത്സരത്തില് 4-1ന്റെ ജയമാണ് ടീം സ്വന്തമാക്കിയത്. ഇതോടെ ചാമ്പ്യന്സ് ലീഗ് യോഗ്യതയിലേക്ക് ടീം ഒരുപടി കൂടി അടുത്തു. ലീഗില് അവശേഷിക്കുന്ന രണ്ട് കളികളില് നിന്ന് മൂന്ന് പോയിന്റ് കൂടി നേടിയാല് ടീമിന് വരുന്ന സീസണിലെ ചാമ്പ്യന്സ് ലീഗ് യോഗ്യത ഉറപ്പാക്കാം.
കരുത്തരായ ബ്രൈറ്റണിനെതിരെ 22-ാം മിനിറ്റിലാണ് ന്യൂകാസില് ആദ്യഗോള് നേടിയത്. ബ്രൈറ്റന് താരം ഡെനിസ് ഉന്ദാവിനെ തട്ടി വലയില് കയറിയതിനാല് ദാനഗോളായാണ് നിശ്ചയിക്കപ്പെട്ടത്. ആദ്യപകുതി പിരിയും മുമ്പേ ന്യൂകാസില് സ്വന്തം നിലയ്ക്കൊരു ഗോള് നേടി. ഇന്ജുറി ടൈമില് ഡാന് ബേണ് ആണ് ഗോളടിച്ചത്.
എതിരില്ലാത്ത രണ്ട് ഗോളിന്റെ ലീഡുമായി ന്യൂകാസില് രണ്ടാം പകുതി ആരംഭിച്ചു. 51-ാം മിനിറ്റില് ബ്രൈറ്റണിന്റെ തിരിച്ചടി. നേരത്തെ ദാനഗോള് സമ്മാനിച്ച ഡെനിസ് ഉന്ദാവ് തന്നെയാണ് ഗോളടിച്ചത്. വാശിപ്പോര് പിന്നെയും പുരോഗമിച്ചു. ഒടുവില് നിശ്ചിത സമയം തീരാന് ഒരു മിനിറ്റുള്ളപ്പോള് കല്ലൂം വില്സണിലൂടെ ന്യൂകാസില് ലീഡ് വര്ദ്ധിപ്പിച്ചു. രണ്ട് മിനിറ്റിനകം ഇന്ജുറി ടൈമില് ബ്രൂണോ ഗ്യുയിമറേസും ഗോള് നേടി ക്വാട്ട തികച്ചു.
69 പോയിന്റുമായി പട്ടികയില് മൂന്നാം സ്ഥാനത്താണ് ന്യൂകാസില്. വരും സീസണ് ചാമ്പ്യന്സ് ലീഗില് ഏത് വിധേനെയും കയറിപ്പറ്റാന് ലിവര്പൂള് ഇന്ന് കളത്തിലിറങ്ങും. ഇന്ന് വൈകീട്ട് 7.30ന് നടക്കുന്ന മത്സരത്തില് ആസ്റ്റണ് വില്ലയാണ് ലിവറിന്റെ എതിരാളികള്. രണ്ട് കളികള് കൂടി അവശേഷിക്കെ 65 പോയിന്റുമായി അഞ്ചാം സ്ഥാനത്താണ് ടീം. മൂന്ന് കളികള് ബാക്കിയുള്ള മാഞ്ചസ്റ്റര് യുണൈറ്റഡ് 66 പോയിന്റുമായി ലിവര്പൂളിന് ഒരുപടി മുന്നിലുണ്ട്.
ജന്മഭൂമി ഓണ്ലൈന്