രാമലീലയ്ക്ക് ശേഷം ദിലീപ്-അരുണ് ഗോപി കൂട്ടുകെട്ടില് റിലീസിനൊരുങ്ങുന്ന ‘ബാന്ദ്ര’യുടെ ടീസര് പുറത്ത്. മാസ്സ് ഗെറ്റപ്പില് ദിലീപ് എത്തുന്ന സിനിമയില് തമന്നയാണ് നായിക. പാന് ഇന്ത്യന് താരനിര ചിത്രത്തിനായി അണിനിരക്കുന്നു എന്നതാണ് മറ്റൊരു പ്രത്യേകത. അജിത് വിനായക ഫിലിംസിന്റെ ബാനറില് വിനായക അജിത് നിര്മിക്കുന്ന ചിത്രത്തില് ഉദയകൃഷ്ണയാണ് തിരക്കഥ ഒരുക്കുന്നത്.
സോഷ്യല് മീഡിയയില് ഇതിനോടകം തന്നെ ടീസര് വൈറലായി മാറിയിരിക്കുകയാണ്. തമന്നയുടെ ആദ്യ മലയാള സിനിമ കൂടിയാണിത്. തമന്നയുടെ മലയാളത്തിലേക്കുള്ള വരവ് ആഘോഷത്തോടെയാണ് മലയാളികള് ഏറ്റുവാങ്ങിയത്. തമന്നയുടെ പിറന്നാള് ദിനത്തില് ബാന്ദ്ര ടീം പുറത്തുവിട്ട പോസ്റ്റര് കൂടുതല് ഹൈപ്പ് നല്കുകയും ചെയ്തിരുന്നു.
റോയല് ലുക്കില് രാജകുമാരിയെ പോലെയായിരുന്നു തമന്ന പോസ്റ്ററില്. തമിഴ് നടന് ശരത് കുമാറും ബോളിവുഡ് നടന് ദിനോ മോറിയയും ചിത്രത്തിലുണ്ട്. സിദ്ദിഖ്, കലാഭവന് ഷാജോണ്, ഗണേഷ് കുമാര് തുടങ്ങി വമ്പന് താരനിരയാണ് ചിത്രത്തില് ഒരുങ്ങുന്നത്.
ദിലീപിന്റെ കരിയറിലെ 147ാം സിനിമയാണിത്. ഷാജി കുമാറാണ് ഛായാഗ്രഹണം. സംഗീതം സാം സി എസ്, എഡിറ്റിംഗ് വിവേക് ഹര്ഷന്, പ്രൊഡക്ഷന് കണ്ട്രോളര് ദീപക് പരമേശ്വരന്, കലാസംവിധാനം സുബാഷ് കരുണ്, സൗണ്ട് ഡിസൈന് രംഗനാഥ് രവി, വസ്ത്രാലങ്കാരം പ്രവീണ് വര്മ്മ. ആക്ഷന് രംഗങ്ങള്ക്ക് ഏറെ പ്രാധാന്യമുള്ള ചിത്രത്തില് മൂന്ന് പേര് ചേര്ന്നാണ് സംഘട്ടനങ്ങള് ഒരുക്കുന്നത്. അന്പറിവ്, ഫിനിക്സ് പ്രഭു, മാഫിയ ശശി എന്നിവരാണ് ആക്ഷന് കോറിയോഗ്രാഫര്മാര്. അഹമ്മദാബാദ്, സിദ്ധാപൂര്, രാജ്കോട്ട്, ഘോണ്ടല്, ജയ്പൂര്, മുംബൈ, ഹൈദരാബാദ് തുടങ്ങിയ ഇടങ്ങളിലായിട്ടായിരുന്നു ചിത്രത്തിന്റെ ഷൂട്ടിങ്ങ്. ശബരിയാണ് പിആര്ഒ.
