മാഡ്രിഡ്: സ്പാനിഷ് ലീഗ് ഫുട്ബോളില്‍ റയല്‍ മാഡ്രിഡിന് വിജയം. മറുപടിയില്ലാത്ത രണ്ട് ഗോളുകള്‍ക്ക് കാഡിസിനെ തോല്‍പ്പിച്ചു. ഗോള്‍രഹിതമായ ആദ്യപകുതിക്കുശേഷം 72-ാം മിനിറ്റില്‍ പ്രതിരോധനിര താരം നാച്ചോ ഫെര്‍ണാണ്ടസ്, 76-ാം മിനിറ്റില്‍ മാര്‍കോ അസെന്‍സിയോ എന്നിവരാണ് റയലിന്റെ വിജയഗോള്‍ നേടിയത്.
കാഡിസിന്റെ തട്ടകത്തില്‍ നടന്ന മത്സരത്തില്‍ റയലിന്റെ സമഗ്രാധിപത്യമായിരുന്നു. പന്ത് കൈവശംവെക്കുന്നതിലും ഷോട്ടുകള്‍ പായിക്കുന്നതിലും ഏറെ മുന്നിട്ടുനിന്നത് റയല്‍ താരങ്ങളായിരുന്നു. അവര്‍ കളിയില്‍ ആകെ പായിച്ചത് 31 ഷോട്ടുകളാണ്. അതില്‍ 11 എണ്ണം ഓണ്‍ ടാര്‍ഗറ്റിലേക്കായിരുന്നു. അതേസമയം ആകെ മൂന്ന് തവണയേ കാഡിസ് താരങ്ങള്‍ക്ക് റയല്‍ ഗോളിയെ പരീക്ഷിക്കാന്‍ കഴിഞ്ഞുള്ളൂ.
വിജയത്തോടെ 29 കളികളില്‍ നിന്ന് 62 പോയിന്റുമായി റയല്‍ രണ്ടാം സ്ഥാനത്തു തുടരുകയാണ്. മറ്റ് കളികളില്‍ റയല്‍ ബെറ്റിസ് ഒന്നിനെതിരെ മൂന്ന് ഗോളുകള്‍ക്ക് എസ്പാനിയോളിനെയും അത്ലറ്റിക് ബില്‍ബാവോ 2-0ന് റയല്‍ സോസിഡാഡിനെയും റയല്‍ വയ്യഡോളിഡ് ഒന്നിനെതിരെ രണ്ട് ഗോളുകള്‍ക്ക് വിയ്യാറയലിനെയും തോല്‍പ്പിച്ചു.
പ്രതികരിക്കാൻ ഇവിടെ എഴുതുക: