ന്യൂയോര്‍ക്: ട്രാന്‍സ്‌ജെന്‍ഡര്‍ അത്‌ലറ്റുകളെ സ്ത്രീകള്‍ക്കെതിരെ മത്സരിക്കാന്‍ അനുവദിക്കില്ലെന്നു ട്രാക്ക് ആന്‍ഡ് ഫീല്‍ഡ് തുടങ്ങി റണ്ണിംഗ് സംബന്ധമായ കായിക ഇനങ്ങളുടെ അന്താരാഷ്ട്ര ഭരണ സമിതി (വേള്‍ഡ് അത്ലറ്റിക്സ്) വ്യാഴാഴ്ച പ്രഖ്യാപിച്ചു. അടുത്തയാഴ്ച പ്രാബല്യത്തില്‍ വരുന്ന നിരോധനം, പുരുഷന്മാരില്‍ നിന്നും സ്ത്രീകളായി മാറിയ ട്രാന്‍സ്‌ജെന്‍ഡര്‍ അത്‌ലറ്റുകള്‍ക്ക് സ്ത്രീ കായികരംഗത്ത് സ്ത്രീകള്‍ക്കെതിരെ മത്സരിക്കുന്നതില്‍ നിന്ന് വിലക്കുമെന്ന് ബിബിസി റിപ്പോര്‍ട്ട് ചെയ്തു.
‘വ്യത്യസ്ത ഗ്രൂപ്പുകള്‍ തമ്മിലുള്ള പരസ്പര വിരുദ്ധമായ ആവശ്യങ്ങളിലും അവകാശങ്ങളിലും തീരുമാനങ്ങള്‍ എല്ലായ്‌പ്പോഴും ബുദ്ധിമുട്ടാണ്, എന്നാല്‍ മറ്റെല്ലാ പരിഗണനകള്‍ക്കും ഉപരിയായി വനിതാ അത്‌ലറ്റുകളോട് നീതി പുലര്‍ത്തണം എന്ന കാഴ്ചപ്പാട് ഞങ്ങള്‍ തുടരുന്നു,’ ലോക അത്ലറ്റിക്സ് പ്രസിഡന്റ് സെബാസ്റ്റ്യന്‍ കോ പറഞ്ഞു. എന്നാല്‍ അത്‌ലറ്റിക്‌സിലെ സ്ത്രീ വിഭാഗത്തിന്റെ സമഗ്രത പരമപ്രധാനമാണെന്ന് ഞങ്ങള്‍ വിശ്വസിക്കുന്നു പ്രസിഡന്റ് കൂട്ടിച്ചേര്‍ത്തു
സെക്‌സ് ഡെവലപ്‌മെന്റില്‍ (ഡിഎസ്ഡി) വ്യത്യാസമുള്ള അത്‌ലറ്റുകള്‍ക്ക് അനുവദനീയമായ രക്ത ടെസ്‌റ്റോസ്റ്റിറോണിന്റെ അളവ് കുറയ്‌ക്കാനും കൗണ്‍സില്‍ വോട്ട് ചെയ്തു. ദക്ഷിണാഫ്രിക്കയിലെ കാസ്റ്റര്‍ സെമന്യയെപ്പോലുള്ള മത്സരാര്‍ത്ഥികള്‍ അവരുടെ രക്തത്തിലെ ടെസ്‌റ്റോസ്റ്റിറോണ്‍ അളവ് അഞ്ചില്‍ നിന്നും ലിറ്ററിന് 2.5 നാനോമോളിനായി കുറയ്‌ക്കേണ്ടതുണ്ട്.
ട്രാക്ക് ആന്‍ഡ് ഫീല്‍ഡ് ഇനങ്ങളില്‍ അന്താരാഷ്‌ട്രതലത്തില്‍ വനിതാ വിഭാഗത്തില്‍ മത്സരിക്കുന്നതിന് ഡിഎസ്ഡി അത്‌ലറ്റുകളുടെ രക്തത്തിലെ ടെസ്‌റ്റോസ്റ്റിറോണ്‍ അളവ് കുറഞ്ഞത് രണ്ട് വര്‍ഷമെങ്കിലും ഈ പരിധിയില്‍ തുടരണം.അത്‌ലറ്റിക്‌സില്‍ നിലവില്‍ അന്താരാഷ്‌ട്രതലത്തില്‍ ട്രാന്‍സ്‌ജെന്‍ഡര്‍ അത്‌ലറ്റുകള്‍ മത്സരിക്കുന്നില്ല, സ്ത്രീ മത്സരത്തില്‍ നീതിക്കും സമഗ്രതയ്‌ക്കും മുന്‍ഗണന നല്‍കാനാണു കൗണ്‍സില്‍ തീരുമാനിച്ചിരിക്കുന്നതെന്നും പ്രസിഡന്റ് കൂട്ടിച്ചേര്‍ത്തു.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: