തോഷഖാന കേസ്: അറസ്റ്റ് വാറണ്ടുമായി പാക് പോലീസ് ഇമ്രാന്‍ ഖാന്റെ വസതിയില്‍; അറസ്റ്റ് തടയാന്‍ സംഘടിച്ചെത്തി തെഹ്‌രീക് ഇ ഇന്‍സാഫ് പ്രവര്‍ത്തകര്‍

ഇസ്ലാമബാദ്: തോഷഖാന കേസുമായി ബന്ധപ്പെട്ട് മുന്‍ പ്രധാനമന്ത്രിയും പാക്കിസ്ഥാന്‍ തെഹ്‌രീക് ഇന്‍സാഫ് പാര്‍ട്ടി(പിടിഐ) നേതാവുമായ ഇമ്രാന്‍ ഖാനെതിരെ അറസ്റ്റ് വാറണ്ട്. ഇമ്രാന്‍ ഖാനെ അറസ്റ്റ് ചെയ്യാന്‍ ഇസ്ലാമാബാദ് പോലീസ് ലാഹോറിലെ സമാന്‍ പാര്‍ക്കിലെ വസതിയിലെത്തി. തുടര്‍ന്ന് പ്രദേശം പിടിഐ പ്രവര്‍ത്തകര്‍ വളഞ്ഞ് പ്രതിഷേധിക്കുകയാണ്. ഇമ്രാന്‍ ഖാന്‍ പ്രധാനമന്ത്രിയായിരിക്കെ ലഭിച്ച സമ്മാനങ്ങള്‍ വിറ്റതാണ് കേസ്.

സെഷന്‍സ് കോടതി ഇമ്രാനെതിരെ ജാമ്യമില്ലാ അറസ്റ്റ് വാറണ്ട് പുറപ്പെടുവിച്ചതിനെ തുടര്‍ന്നാണ് പോലീസ് എത്തിയിരിക്കുന്നത്.  പോലീസ് എത്തിയ സമയത്ത് ഇമ്രാന്‍ വസതിയില്‍ ഇല്ലായിരുന്നു. അതിനാല്‍ അറസ്റ്റ് ചെയ്യാന്‍ സാധിച്ചിട്ടില്ല. പ്രതിഷേധക്കാര്‍ ഇരച്ചെത്തിയതോടെ പഞ്ചാബ് പോലീസും സ്ഥലത്തെത്തിയിട്ടുണ്ട്. അറസ്റ്റ് തടയുന്നതിനായി പ്രവര്‍ത്തകരോട് സംഘടിച്ചെത്താന്‍ തെഹ്രിക് ഇ ഇന്‍സാഫ് ആഹ്വാനം ചെയ്യുകയായിരുന്നു.  

അറസ്റ്റ് തടയുന്നവര്‍ക്കെതിരേ നടപടി കൈക്കൊള്ളുമെന്ന് പോലീസ് അറിയിച്ചിട്ടുണ്ട്. വെറുംകയ്യോടെ മടങ്ങിപ്പോവില്ലെന്നും ഇസ്ലാമാബാദ് പോലീസ് മേധാവി അറിയിച്ചു. അറസ്റ്റ് നടന്നാല്‍ വലിയ പ്രതിഷേധമുണ്ടാകുമെന്ന് പിടിഐ ഭീഷണിയും മുഴക്കിയിട്ടുണ്ട്.  

പ്രധാനമന്ത്രിക്ക് ലഭിക്കുന്ന നിശ്ചിത തുകയില്‍ കുറവ് മൂല്യമുള്ള സമ്മാനങ്ങള്‍ കൈപ്പറ്റാം. അല്ലാത്തവ തോഷഖാന എന്ന സംവിധാനത്തിലേക്ക് കൈമാറണമെന്നാണ് നിയമം. ആവശ്യമെങ്കില്‍ സാധനത്തിന്റെ വിലയുടെ 50 ശതമാനം നല്‍കി ഇത് വാങ്ങണമെന്നിരിക്കെ 20 ശതമാനം വരെ കുറഞ്ഞ വിലയ്‌ക്ക് വാങ്ങി ഇമ്രാന്‍ ഖാന്‍ മറിച്ചുവിറ്റുവെന്നതാണ് കേസ്. 2018 മുതല്‍ 4 വര്‍ഷം പ്രധാനമന്ത്രിയായിരുന്നപ്പോള്‍ 14 കോടി പാക് രൂപ (ഏകദേശം 5.25 കോടി ഇന്ത്യന്‍ രൂപ) വിലമതിക്കുന്ന വാച്ച് ഉള്‍പ്പെടെയുള്ള സമ്മാനങ്ങള്‍ ഇമ്രാന്‍ ഖാന്‍ വാങ്ങുകയും വില്‍ക്കുകയും ചെയ്‌തെന്നാണ് ആരോപണം. ആദ്യം സര്‍ക്കാരിനെ ഏല്‍പിച്ച വസ്തുക്കള്‍ പിന്നീട് കുറഞ്ഞ വിലയ്‌ക്ക് ലേലത്തില്‍ വാങ്ങുകയും അനേകം ഇരട്ടി വിലയ്‌ക്ക് പൊതുവിപണിയില്‍ വില്‍ക്കുകയും ചെയ്തതായി ഇമ്രാന്‍ സമ്മതിച്ചിട്ടുമുണ്ട്.  

കേസില്‍ കഴിഞ്ഞാഴ്ച വിചാരണയ്‌ക്ക് ഹാജരാകുമെന്ന് അറിയിച്ചിരുന്നെങ്കിലും ഇമ്രാന്‍ ഹാജരായിരുന്നില്ല. അതേസമയം ജാമ്യമില്ലാ അറസ്റ്റ് വാറന്റ് റദ്ദാക്കാന്‍ കോടതിയെ സമീപിക്കുമെന്ന് ഇമ്രാന്റെ അഭിഭാഷകര്‍ അറിയിച്ചു. ഇമ്രാനെ കസ്റ്റഡിയില്‍ എടുക്കാനും മാര്‍ച്ച് ഏഴിന് കോടതിയില്‍ ഹാജരാക്കാനുമാണ് വാറന്റില്‍ പറഞ്ഞിരിക്കുന്നത്. കേസില്‍ ഇമ്രാന്‍ ഖാന്‍ കുറ്റക്കാരനാണെന്നു കണ്ടെത്തിയ തെരഞ്ഞെടുപ്പു കമ്മിഷന്‍ പദവികള്‍ വഹിക്കുന്നതില്‍ നിന്ന് അദ്ദേഹത്തെ വിലക്കിയിരുന്നു.