തിരുവനന്തപുരം: ഗുജറാത്ത് കലാപവുമായി ബന്ധപ്പെട്ട് ബിബിസി തയാറാക്കിയ ‘ഇന്ത്യ: ദ മോദി ക്വസ്റ്റ്യന്’ എന്ന ഡോക്യുമെന്ററിയുമായി ബന്ധപ്പെട്ട വിവാദം കത്തിപ്പടരുന്നതിനിടെ വ്യക്തമായ നിലപാടുമായി കോണ്ഗ്രസ് നേതാവ് എ.കെ. ആന്റണിയുടെ മകനും കെപിസിസി ഡിജിറ്റല് മീഡിയ സെല് കണ്വീനറുമായ അനില് ആന്റണി രംഗത്ത്. ഇന്ത്യന് സ്ഥാപനങ്ങളെക്കാള് ബിബിസിയുടെ വീക്ഷണത്തിന് മുന്തൂക്കം കല്പിക്കുന്നത് വളരെ അപകടകരമായ കീഴ് വഴക്കമാണെന്ന് അനില് ആന്റണി ട്വീറ്റ് ചെയ്തു.
‘ബിജെപിയോട് വലിയ അഭിപ്രായ വ്യത്യാസമുണ്ട്, എന്നിരുന്നാലും ഇന്ത്യയിലുള്ളവര് ഇന്ത്യന് സ്ഥാപനങ്ങളെക്കാള് ബിബിസിയുടെ വീക്ഷണത്തിന് മുന്തൂക്കം കല്പിക്കുന്നത് വളരെ അപകടകരമായ കീഴ്വഴക്കമാണ് എന്ന് ഞാന് വിശ്വസിക്കുന്നു. മാത്രമല്ല, നമ്മുടെ പരമാധികാരത്തിന്മേലുള്ള കടന്നുകയറ്റമാണ്. കാരണം ഒട്ടേറെ മുന്വിധികളുടെ വലിയ ചരിത്രമുള്ള ബ്രിട്ടന് പിന്തുണക്കുന്ന ഒരു ചാനലാണ് ബിബിസി. മാത്രവുമല്ല, ഇറാഖ് യുദ്ധത്തിന് പുറകിലെ തലച്ചോറായിരുന്നു ജാക്ക് സ്ട്രോ’.
