ന്യൂദല്ഹി: കള്ളക്കടത്തിലും കുറ്റകൃത്യങ്ങളിലും കുപ്രസിദ്ധി നേടിയ സര്ക്കാരാണ് കേരളത്തിലേതെന്ന് ബിജെപി നേതാവ് പ്രകാശ് ജാവദേക്കര്. തെലങ്കാനയില് പോയി പ്രധാനമന്ത്രിയെ വിമര്ശിക്കുകയാണ് പിണറായി വിജയന്. എന്നാല് അദ്ദേഹത്തിന്റെ പാര്ട്ടിക്കാര് കേരളത്തില് സൂപ്പര് മാര്ക്കറ്റ് ഉടമയെ ആക്രമിക്കുന്നു.
ഹോട്ടലുകളില് വിളമ്പുന്നത് നല്ല ഭക്ഷണമാണെന്ന് ഉറപ്പുവരുത്താന് പോലും സര്ക്കാരിനാകുന്നില്ല. ഭക്ഷ്യസുരക്ഷ ഉറപ്പ് വരുത്തുന്നതിലും പിണറായി സര്ക്കാര് പരാജയമാണെന്ന് അദ്ദേഹം ദല്ഹിയില് മാധ്യമങ്ങളോട് പറഞ്ഞു. മോദി സര്ക്കാര് പോപ്പുലര് ഫ്രണ്ടിനെ നിരോധിച്ചു. എന്നാല് എണ്ണൂറോളം പോലീസുകാര് ഭീകരവാദസംഘടനകളുമായി ബന്ധമുള്ളവരോ ക്രിമിനല് പശ്ചാത്തലമുള്ളവരോ ആണെന്ന് സമ്മതിക്കുകയാണ് കേരള മുഖ്യമന്ത്രി. ഇവര്ക്കെതിരെ നടപടിയില്ല.
ഇങ്ങനെയൊരു മുഖ്യമന്ത്രിയെ വേറെ എവിടെയും കാണില്ല. സംസ്ഥാനത്തിന് പദ്ധതികള് അനുവദിക്കുന്നതില് മോദി സര്ക്കാര് ഒരു വിവേചനവും കാട്ടുന്നില്ല. കേരളത്തിലുള്ള 1.52 കോടി ആളുകള്ക്ക് കേന്ദ്രത്തിന്റെ സൗജന്യ അരി ലഭിക്കുന്നു. പിഎം കിസാന് സമ്മാന് യോജനയിലൂടെ 34 ലക്ഷം കര്ഷകര്ക്ക് ആനുകൂല്യം ലഭിക്കുന്നു. 52 ലക്ഷം പേര്ക്ക് മുദ്രാ വായ്പ ലഭിച്ചു. 3.4 ലക്ഷം സ്ത്രീകള് സൗജന്യ ഗ്യാസ് കണക്ഷന് ലഭ്യമായി, അദ്ദേഹം പറഞ്ഞു.
