മുംബൈ: എയര്‍ഇന്ത്യ വിമാനത്തില്‍ സഹയാത്രികന്‍ വനിതയാത്രക്കാരിക്കു നേരേ മൂത്രമൊഴിച്ച സംഭവത്തില്‍ ലഭിച്ച പരാതി പോലീസിന് കൈമാറിയെന്ന് എയര്‍ഇന്ത്യ. മുന്‍പ് നല്‍കിയ പരാതി ഗൗരവമായി കാണാത്തതിനെ തുടര്‍ന്ന് യാത്രക്കാരി ടാറ്റാ ഗ്രൂപ്പ് ചെയര്മാന് എന്‍. ചന്ദ്രശേഖരന് പരാതി നല്‍കിയതിനു ശേഷം മാത്രമാണ് വിമാനക്കമ്പനി അന്വേഷണം ആരംഭിച്ചതും പരാതി പോലീസിനു കൈമാറിയതെന്നും ആക്ഷേപമുണ്ട്. ന്യൂയോര്‍ക്കില്‍നിന്ന് ഡല്‍ഹിയിലേക്കുള്ള എയര്‍ ഇന്ത്യയുടെ എഐ102 വിമാനത്തിലെ ബിസിനസ് ക്ലാസില്‍ കഴിഞ്ഞ നവംബറിലാണ് സംഭവം.
ഉച്ച ഭക്ഷണത്തിനു ശേഷം ലൈറ്റുകള്‍ അണച്ചപ്പോഴാണ് പൂര്‍ണമായും മദ്യലഹരിയിലായിരുന്ന യാത്രക്കാരന്‍ തന്റെ സീറ്റിനടുത്തേക്ക് വന്ന് പാന്റിന്റെ സിപ്പ് അഴിച്ച ശേഷം സ്വകാര്യ ഭാഗങ്ങള്‍ പ്രദര്‍ശിപ്പിക്കുകയും തുടര്‍ന്ന് മൂത്രമൊഴിക്കുകയും ചെയ്തത്. തുടര്‍ന്നും അവിടെ തന്നെ നില്‍ക്കുകയായിരുന്ന യാത്രക്കാരനെ മറ്റൊരു യാത്രക്കാരനെത്തിയാണ് മാറ്റിയത്. തന്റെ വസ്ത്രവും ഷൂവും ബാഗും മുഴുവനും മൂത്രം വീണ് നനഞ്ഞെന്നും പരാതിയില്‍ യാത്രക്കാരി പറയുന്നു. യാത്രക്കാരി സംഭവം ജീവനക്കാരുടെ ശ്രദ്ധയില്‍ പെടുത്തിയിട്ടും ഒരു നടപടിയും ഉണ്ടായില്ല. നനഞ്ഞ സീറ്റില്‍ ഇരിക്കാന്‍ കഴിയാത്തതിനാല്‍ ജീവനക്കാരുടെ സീറ്റ് നല്‍കുകയായിരുന്നു. വിമാനത്തിന്റെ ഫസ്റ്റ് ക്ലാസില്‍ സീറ്റുകള്‍ ഒഴിവുണ്ടായിട്ടും നനഞ്ഞ സീറ്റില്‍ ഇരിക്കാന്‍ ജീവനക്കാര്‍ നിര്‍ബന്ധിച്ചുവെന്നും പരാതിയില്‍ പറയുന്നു. വിമാനം ഡല്‍ഹിയില്‍ ഇറങ്ങിയപ്പോള്‍ അക്രമം നടത്തിയയാള്‍ യാതൊരു നടപടിയും നേരിടാതെ വിമാനത്താവളത്തില്‍നിന്നു പുറത്തുപോവുകയായിരുന്നു. തുടര്‍ന്നാണ് യാത്രക്കാരി ടാറ്റ ഗ്രൂപ്പ് ചെയര്മാന് പരാതി നല്‍കിയത്.
പ്രതികരിക്കാൻ ഇവിടെ എഴുതുക: