വെള്ളരിക്കുണ്ട്: വേട്ടനായ്ക്കളെ ഉപയോഗിച്ച് ഗര്‍ഭിണിയായ ആടിനെ കടിച്ചു കൊലപ്പെടുത്തിയ ശേഷം ഇറച്ചി വില്‍പ്പന നടത്തിയ യുവാവിനെ പോലീസ് അറസ്റ്റ് ചെയ്തു. വെള്ളരിക്കുണ്ട് പുങ്ങംചാലിലെ മിഥുന്‍ മോഹന്‍ ആണ് (31) അറസ്റ്റിലായത്.
പറമ്പില്‍ മേയാന്‍ കെട്ടിയ പുങ്ങംചാല്‍ പറാടാങ്കയത്തെ കാനത്തില്‍ സന്തോഷിന്റെ 16,000രൂപ വില വരുന്ന ആടിനെയാണ് മോഷ്ടിച്ചത്. സന്തോഷ് നല്‍കിയ പരാതിയില്‍ വെള്ളരിക്കുണ്ട് പോലീസ് കേസെടുത്ത് നടത്തിയ അന്വേഷണത്തിലാണ് ആട് മോഷ്ടാവ് പിടിയിലായത്. ചാളി എന്ന മിഥുന്‍മോഹനെ സംശയാസ്പദമായ രീതിയില്‍ ഈ ഭാഗത്ത് കണ്ടതായി വിവരം ലഭിച്ചതാണ് പോലീസിന് പ്രതിയെ എളുപ്പത്തില്‍ പിടികൂടാന്‍ കഴിഞ്ഞത്.
മിഥുന്‍ മോഹന്‍ ആടിനെ ചാക്കില്‍ക്കെട്ടി കാറില്‍ കടത്തിക്കൊണ്ടുപോയതായി വിവരം ലഭിക്കുകയും ചെയ്തു. അട്ടേങ്ങാനം സ്വദേശിയായ കാര്‍ ഉടമക്കാണ് മിഥുന്‍ ആടിനെ വില്‍പ്പന നടത്തിയത്. വിലക്ക് വാങ്ങിയ ആടാണെന്നും ഇറച്ചിവില തവണകളായി തന്നാല്‍ മതിയെന്നും പറഞ്ഞു വിശ്വസിപ്പിച്ച ശേഷമായിരുന്നു വില്‍പ്പന. തുടര്‍ന്ന് പോലീസ് നടത്തിയ പരിശോധനയില്‍ ആട്ടിറച്ചി കണ്ടെത്തുകയായിരുന്നു.
പ്രതികരിക്കാൻ ഇവിടെ എഴുതുക: