കൊച്ചി: കേബിള് കഴുത്തില് കുരുങ്ങി ബൈക്ക് യാത്രികരായ ദമ്പതികൾക്ക് പരിക്ക്. എറണാകുളം ലായം റോഡിലാണ് അപകടമുണ്ടായത്. റോഡിലേയ്ക്ക് താഴ്ന്ന് കിടന്ന കേബിള് കഴുത്തില് കുരുങ്ങുകയായിരുന്നു. എറണാകുളം സൗത്ത് സ്വദേശി സാബുവിനും ഭാര്യ സിന്ധുവിനുമാണ് പരിക്കേറ്റത്.
ഇരുചക്ര വാഹനത്തില് വന്ന സാബുവിന്റെ കഴുത്തിലാണ് കേബിള് കുരുങ്ങിയത്. റോഡിലേയ്ക്ക് വീണ സാബുവും ഭാര്യയും തലനാരിഴയ്ക്കാണ് രക്ഷപ്പെട്ടത്. റോഡിന്റെ നടുഭാഗത്തായി താഴ്ന്നു കിടന്ന കേബിള് കഴുത്തില് കുരുങ്ങി വണ്ടിയില് നിന്ന് വീഴുകയായിരുന്നെന്ന് സാബു പറഞ്ഞു. റോഡിൽ തലയിടിച്ച് വീണ സാബുവിന്റെ ഭാര്യ സിന്ധു ഹെല്മറ്റ് ഉള്ളതുകൊണ്ട് മാത്രമാണ് രക്ഷപെട്ടതെന്നും പറഞ്ഞു.
കൊച്ചിയുടെ പലഭാഗത്തും ഇപ്പോഴും കാൽനടയാത്രക്കാർക്കും ഇരുചക്രവാഹനങ്ങൾക്കും ഭീഷണിയായി കേബിളുകൾ റോഡിലേക്ക് താഴ്ന്നു കിടപ്പുണ്ട്. കെഎസ്ഇബിയുടെ പോസ്റ്റുകളിൽ അനുവാദമില്ലാതെ പല സ്ഥാപനങ്ങളും കേബിൾ സ്ഥാപിച്ചതായി നേരത്തെ കണ്ടെത്തിയിരുന്നു. ഇവയിൽ പലതും മുറിച്ച് മാറ്റി. പലയിടങ്ങളിലും ഉപയോഗമില്ലാത്ത കേബിളുകൾ ഇപ്പോഴുമുണ്ട്. കേബിളുകൾ ടാഗ് ചെയ്യണമെന്ന നിർദേശം കമ്പനികൾ പൂർണമായി പാലിച്ചിട്ടുമില്ല.
