“ഞങ്ങളെ ദൈവം അങ്ങോട്ട് വിളിച്ചാല്‍ മൂന്ന് പേരും വീണ്ടും ഒരുമിച്ച് ചേരും”- മകള്‍ നന്ദനയുടെ ജന്മവാര്‍ഷിക ദിനത്തില്‍ വൈറലായി ഗായിക ചിത്രയുടെ കുറിപ്പ്

തിരുവനന്തപുരം: അകാലത്തില്‍ പൊലിഞ്ഞ മകള്‍ നന്ദനയുടെ ജന്മവാര്‍ഷിക ദിനത്തില്‍ വിതുമ്പുന്ന കുറിപ്പുമായി ഗായിക ചിത്ര. “ഞങ്ങളെ ദൈവം അങ്ങോട്ട് വിളിച്ചാല്‍ നമ്മള്‍ മൂന്ന് പേരും വീണ്ടും ഒരുമിച്ച് ചേരും”- ഫേസ്ബുക്കില്‍ ചിത്ര കുറിച്ചു.  

“കാലത്തിന് മുറിവ് ഉണക്കാനാവില്ല. ഇത് ദൈവത്തിന്റെ തീരുമാനവുമായിരുന്നില്ല. ഞങ്ങളുടെ നഷ്ടമെന്തെന്ന് ശരിക്കും ദൈവത്തിന് അറിയുമായിരുന്നെങ്കില്‍ നന്ദന ഇന്നും ഞങ്ങള്‍ക്കൊപ്പം ഉണ്ടാകുമായിരുന്നു.” – കുറിപ്പില്‍ ചിത്ര എഴുതുന്നു. 

ഇംഗ്ലീഷില്‍ മകളുടെ ചിത്രത്തോടൊപ്പം നല്‍കിയ കുറിപ്പ് ഇങ്ങിനെ പോകുന്നു:” സ്വര്‍ഗത്തിലെ നിന്റെ ജന്മദിനമാണിന്ന്. അവിടെ മാലാഖമാരുമൊന്നിച്ച് നീ ഈ ദിനം ആഘോഷിക്കുന്നുണ്ടാകും. എത്ര വര്‍ഷങ്ങള്‍ കടന്നുപോയാലും നിനക്ക് പ്രായമാകില്ല. നീ അകലെയാണെങ്കിലും സുരക്ഷിതയാണന്ന് അറിയാം. ഞാന്‍ നിന്നെ ഒരു പാട് സ്നേഹിക്കുന്നു. എല്ലാ ദിവസത്തേക്കാളുമേറെ നിന്നെ എനിക്ക് മിസ് ചെയ്യുന്നു.- പിറന്നാള്‍ ആശംസകള്‍. “

45,000 ലൈക്കുകളും 4400 കമന്‍റുകളും 267 ഷെയറുകളുമാണ് ഈ പോസ്റ്റിന് ലഭിച്ചത്. വിവാഹത്തിന് ശേഷം ഏറെ വര്‍ഷങ്ങളുടെ കാത്തിരിപ്പിന് ശേഷമാണ് നനന്ദ എന്ന കുഞ്ഞ് ജനിക്കുന്നത്. 2002ല്‍ പിറന്ന നന്ദന എട്ട് വര്‍ഷത്തിന് ശേഷം 2011ല്‍ ദുബായില്‍ ഒരു നീന്തല്‍ക്കുളത്തില്‍ വീണ് മരിക്കുകയായിരുന്നു. മകളുടെ ഈ വേര്‍പാട് ചിത്രയ്‌ക്ക് താങ്ങാനാവാത്ത ആഘാതമായിരുന്നു .