ദോഹ: ടീമിന്റെ ഒറ്റക്കെട്ടായ പരിശ്രമത്തിന്റെ ഫലമാണ് അർജന്റീനയുടെ കിരീടനേട്ടമെന്ന് സൂപ്പർ താരം ലയണൽ മെസി. തങ്ങളെ വിശ്വസിച്ച എല്ലാവരോടും നന്ദിയുണ്ടെന്നും അദ്ദേഹം ഫേസ്ബുക്ക് പോസ്റ്റിൽ കുറിച്ചു. എന്റെ കുടുംബത്തിന് നന്ദി, എന്നെ പിന്തുണക്കുകയും ഞങ്ങളെ പിന്തുണക്കുകയും ചെയ്ത എല്ലാവരോടും നന്ദിയുണ്ട്. നമ്മൾ ഒരുമിച്ച് പോരാടിയാൽ അർജന്റീനക്ക് നേടാനാവത്ത ഒന്നുമില്ലെന്നും നമ്മൾ ഒരിക്കൽ കൂടി തെളിയിച്ചിരിക്കുന്നെന്ന് മെസി ഫേസ്ബുക്കിൽ കുറിച്ചു.
ലോകജേതാക്കളുടെ ജേഴ്സിയിൽ തുടരണമെന്നും അന്താരാഷ്ട്ര മത്സരങ്ങളിൽ നിന്നും വിരമിക്കാൻ ഒരുങ്ങുന്നില്ലെന്നും ലോകകപ്പ് കിരീടം സ്വന്തമാക്കിയതിന് ശേഷം മെസി മാധ്യമങ്ങളോട് പറഞ്ഞു. വർഷങ്ങളായി മുന്നിൽ കണ്ട സ്വപ്നം. വിശ്വസിക്കാനാവുന്നില്ല – മെസി പറഞ്ഞു. ദൈവം എനിക്ക് ഈ വിജയം സമ്മാനിക്കുമെന്ന് ആത്മവിശ്വാസം ഉണ്ടായിരുന്നുവെന്നും അദ്ദേഹം കൂട്ടിച്ചേർത്തു.
നിലവിലെ ചാമ്പ്യൻമാരായ ഫ്രാൻസിനെതിരെ വാശിയേറിയ ഫൈനലിൽ അർജന്റീനയെ മുന്നിൽ നിന്ന് നയിച്ച് ലയണൽ മെസി ആഘോഷതിമിർപ്പിലാണ്. ഡ്രസ്സിംഗ് റൂമിനുള്ളിലെ മേശപ്പുറത്ത് ലോകകപ്പ് ട്രോഫിയുമായി മെസി നൃത്തം ചെയ്യുന്ന വീഡിയോയാണ് ഇപ്പോൾ സോഷ്യൽ മീഡിയയിൽ ശ്രദ്ധ നേടുന്നത്. മെസ്സിക്കൊപ്പം താരങ്ങൾ ഒന്നടങ്കം നൃത്തം ചെയ്യുന്നതിന്റെ ദൃശ്യങ്ങൾ നിക്കോളാസ് ഓട്ടോമെൻഡി പങ്കുവച്ചു.
‘പ്ലയർ ഓഫ് ദ ടൂർണമെന്റിന്’ നൽകിയ ഗോൾഡൻ ബോളും മെസി നേടി.
