പെരിയ(കാസര്‍ഗോഡ്): ആസാദി കാ അമൃത് മഹോത്സത്തോട് അനുബന്ധിച്ച രണ്ടു ദിവസത്തെ പ്രദര്‍ശനത്തിനും ശില്പശാലയ്‌ക്കും പെരിയ ഡോ. അംബേദ്കര്‍ ആര്‍ട്‌സ് ആന്‍ഡ് സയന്‍സ് കോളജില്‍ തുടക്കമായി. കേന്ദ്ര വാര്‍ത്താ വിതരണ പ്രക്ഷേപണ മന്ത്രാലയത്തിനു കീഴില്‍ കണ്ണൂരിലുള്ള സെന്‍ട്രല്‍ ബ്യൂറോ ഓഫ് കമ്യൂണിക്കേഷന്‍ സംഘടിപ്പിക്കുന്ന പരിപാടി കാസര്‍ഗോഡ് ജില്ലാ പഞ്ചായത്ത് പ്രസിഡന്റ് ബേബി ബാലകൃഷ്ണന്‍ ഉദ്ഘാടനം ചെയ്തു.
ജനാധിപത്യവും സ്വാതന്ത്ര്യവും കാത്തു സൂക്ഷിക്കേണ്ടത് സംബന്ധിച്ചു പുതുതലമുറയ്‌ക്ക് ഉത്തമ ബോധ്യമുണ്ടാവണം. സ്വാതന്ത്ര്യത്തിന്റെ അമൃതോത്സവം നമ്മുടെ രാഷ്‌ട്രത്തിന്റെ ഭാവി എന്താകണം എന്ന ആലോചന കൂടിയാകണമെന്നും ബേബി ബാലകൃഷ്ണന്‍ പറഞ്ഞു. പുല്ലൂര്‍ പെരിയ ഗ്രാമ പഞ്ചായത്ത് പ്രസിഡന്റ് സി കെ അരവിന്ദാക്ഷന്‍ അധ്യക്ഷത വഹിച്ചു.
സെന്‍ട്രല്‍ ബ്യൂറോ ഓഫ് കമ്യൂണിക്കേഷന്‍ കണ്ണൂര്‍ ജില്ലാ ഫീല്‍ഡ് പബ്ലിസിറ്റി ഓഫീസര്‍ ബിജു കെ.മാത്യു, ടെക് നിക്കല്‍ അസിസ്റ്റന്റ് കെ.എസ് ബാബു രാജന്‍, കോളജ് പ്രിന്‍സിപ്പല്‍ ഡോ. ജയചന്ദ്രന്‍ കീഴോത്ത്, ഡോ. അംബേദ്കര്‍ ട്രസ്റ്റ് അഡ്മിനിസ്‌ട്രേറ്റര്‍ ബിപുല റാണി, എന്‍ എസ് എസ് പ്രോഗ്രാം ഓഫീസര്‍ സി.ഷിജിത്ത്, കോളജ് യൂണിയന്‍ ചെയര്‍പേഴ്‌സണ്‍ അമൃത ടി. പ്രസംഗിച്ചു.
വന മേഖലയും ജൈവ മണ്ഡലവും നേരിടുന്ന പ്രശ്‌നങ്ങള്‍ ലാഘവത്തോടെ കാണരുതെന്ന് പരിസ്ഥിതി സംരക്ഷണം സംബന്ധിച്ച് പ്രഭാഷണം നടത്തിയ സുനില്‍ കുമാര്‍ കരിച്ചേരി പറഞ്ഞു. ഫാസ്റ്റ് ഫുഡ് സംസ്‌കാരത്തില്‍ നിന്ന് ഹെല്‍ത്തി ഫുഡ് സംസ്‌കാരത്തിലേക്കുള്ള ചുവടുമാറ്റം നിരവധി ആരോഗ്യ പ്രശ്‌നങ്ങള്‍ക്ക് പരിഹാരമാകു മെന്ന് ഈ വിഷയ ത്തില്‍ ക്ലാസെടുത്ത കുറ്റിക്കോല്‍ ആയുഷ് പി എച്ച് സി മെഡിക്കല്‍ ഓഫീസര്‍ ഡോ. ജോമി തോമസ് പറഞ്ഞു.
സ്വാതന്ത്ര്യ സമരവുമായി ബന്ധപ്പെട്ട സംഭവങ്ങളും വ്യക്തികളെയും ചിത്രീകരിക്കുന്ന എണ്‍പതോളം ചിത്രങ്ങളാണ് പ്രദര്‍ശനത്തിനുള്ളത്. ആധാര്‍ തിരുത്തല്‍ ഉള്‍പ്പെടെ സേവനങ്ങളുമായി തപാല്‍ വകുപ്പിന്റെ സ്റ്റാള്‍ കോളജില്‍ പ്രവര്‍ത്തിക്കുന്നു. ശുചിത്വ മിഷന്‍, കുടുംബശ്രീ എന്നിവയും സ്റ്റാളുകള്‍ ഒരുക്കിയിട്ടുണ്ട്. പ്രദര്‍ശനം വെള്ളിയാഴ്ച സമാപിക്കും.
പ്രതികരിക്കാൻ ഇവിടെ എഴുതുക: