മൈത്രി മൂവി മേക്കേഴ്സിന്റെ കീഴില് ഗോപിചന്ദ് മാലിനേനി സംവിധാനം ചെയ്യുന്ന വീരസിംഹ റെഡ്ഡിയില് ഇതുവരെ കാണാത്ത മാസ് അവതാരത്തിലാണ് സൂപ്പര് താരം നതസിംഹ നന്ദമുരി ബാലകൃഷ്ണ പ്രത്യക്ഷപ്പെടുന്നത്. തിയറ്ററുകളില് ആരാധകര്ക്ക് ആവേശം പകരാന് തക്ക ഘടകങ്ങള് ചിത്രത്തിലുണ്ടാകും എന്നാണ് പ്രതീക്ഷകള്. ചിത്രത്തിലെ ജയ് ബാലയ്യ എന്ന ആദ്യ ഗാനം ഇപ്പൊള് അണിയറ പ്രവര്ത്തകര് പുറത്ത് വിട്ടിരിക്കുകയാണ്.
ജയ് ബാലയ്യ എന്നത് ബാലകൃഷ്ണ ആരാധകര്ക്ക് വേണ്ടി ഒരുക്കിയ ഒരു മാസ് ഗാനമാണ്, സംഗീത സംവിധായകന് എസ്.എസ്. തമന് ആണ് ഗാനം ഒരുക്കിയത്. സരസ്വതിപുത്ര രാമജോഗയ്യ ശാസ്ത്രിയുടെ വരികള് ഗാനത്തെ കൂടുതല് മനോഹരമാക്കുന്നു. ബാലകൃഷ്ണയുടെ നൃത്തച്ചുവടുകള് ആണ് ഗാനത്തിന്റെ മറ്റൊരു ആകര്ഷണം. ഇതിനോടകം തന്നെ ഹിറ്റ്ലിസ്റ്റുകളില് ഗാനം ഇടംപിടിച്ചുകഴിഞ്ഞു.
ശ്രുതി ഹാസന് നായികയായി അഭിനയിക്കുന്ന ചിത്രത്തില് ദുനിയ വിജയ്, വരലക്ഷ്മി ശരത്കുമാര് എന്നിവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. റിഷി പഞ്ചാബി ഛായാഗ്രഹണം നിര്വ്വഹിക്കുന്നു. നവീന് യേര്നേനിയും വൈ രവിശങ്കറും ചേര്ന്നാണ് ചിത്രം നിര്മ്മിക്കുന്നത്. പ്രശസ്ത എഴുത്തുകാരന് സായ് മാധവ് ബുറയാണ് സംഭാഷണങ്ങള് ഒരുക്കിയിരിക്കുന്നത്.
