കൊച്ചി: നഗരത്തിലെ കാനയില്‍ വീണ് മൂന്ന് വയസുകാരന് പരിക്കേറ്റു. കൊച്ചിയിലെ പനമ്പിള്ളിനഗറിലാണ് സംഭവം. ഇന്നലെ രാത്രി 8 മണിയോടെയായിരുന്നു അപകടം. നടപ്പാതയുടെ വിടവിലൂടെ കുട്ടി ഓടയിലേക്ക് വീഴുകയായിരുന്നു. കുട്ടിയുടെ അമ്മ തക്കസമയത്ത് ഇടപെട്ടതിലാനാലാണ് കൂടുതല്‍ അപകടം ഒഴിവായത്.
പനമ്പിള്ളി നഗര്‍ ഗ്രന്ഥപ്പുര ലൈബ്രറിക്ക് സമീപം വോക്ക് വേയിലെ ഓടയില്‍ വെച്ചാണ് സംഭവം. കാനയിലേക്ക് വീണ കുട്ടിയെ അമ്മ പെട്ടന്നു കാൽകൊണ്ട് തടഞ്ഞുവയ്‌ക്കുകയും പിന്നീട് പിടിച്ചു കയറ്റുകയുമായിരുന്നു. കുട്ടി ആശുപത്രിയില്‍ ചികിത്സയിലാണ്. കുട്ടിയുടെ ആരോഗ്യനില തൃപ്തികരമാണ്. മെട്രോ ഇറങ്ങി അച്ഛനും അമ്മയ്‌ക്കുമൊപ്പം നടന്ന് പോവുകയായിരുന്ന കുട്ടി പെട്ടെന്ന് കാനയുടെ വിടവിലേക്ക് വീണു പോവുകയായിരുന്നു.
ഈ കാന മൂടണമെന്ന് നിരവധി തവണ പ്രദേശവാസികള്‍ ആവശ്യപ്പെട്ടിരുന്നെങ്കിലും അതിനുള്ള നടപടികള്‍ ഇതുവരെ അധികൃതര്‍ സ്വീകരിച്ചിട്ടില്ല എന്നാണ് ആരോപണം.
പ്രതികരിക്കാൻ ഇവിടെ എഴുതുക: