തിരുവനന്തപുരം: ചൈനയിലെ ആദ്യത്തേതും ഏകവുമായ അന്താരാഷ്ട്ര മത്സര ഫീച്ചര് ഫിലിം ഫെസ്റ്റിവലായ ഷാങ്ഹായ് ചലച്ചിത്രമേളയില് മലയാളി സംവിധായകന് യദു വിജയകൃഷ്ണന്റെ സംസ്കൃത സിനിമ ‘ഭഗവദജ്ജുകം’ പ്രദര്ശിപ്പിക്കും. ആര് ആര് ആര്, ഫുണറല് എന്നിവയാണ് അവിടെ പ്രദര്ശിപ്പിക്കുന്ന ഇന്ത്യന് സിനിമകള്.
ഗോവ അന്താരാഷ്ട്ര ചലച്ചിത്രമേളയിലാണ് ‘ഭഗവദജ്ജുകം’ ആദ്യമായി പ്രദര്ശിപ്പിച്ചത്. ന്യൂയോര്ക്ക്, മെല്ബണ് മേളകളിലും ചിത്രം പ്രദര്ശിപ്പിക്കപ്പെട്ടു. കേരള ഫിലിം ക്രിട്ടിക്സ് അവാര്ഡ് ഉള്പ്പെടെ അംഗാകാരങ്ങളും ലഭിച്ചു.
ഏഴാം നൂറ്റാണ്ടിലെ ബോധായനന്റെ നാടകത്തെ ആസ്പദമാക്കിയാണ് ചിത്രം അണിയിച്ചൊരുക്കിയിരിക്കുന്നത്. ഹാസ്യത്തിന് പ്രാധാന്യം നല്കിക്കൊണ്ട് നിര്മ്മിക്കുന്ന ആദ്യ സംസ്കൃത ചലച്ചിത്രംകൂടിയാണ്. ചരിത്രത്തെ ആസ്പദമാക്കിയും നിരവധി പരീക്ഷണങ്ങള് സംസ്കൃതത്തില് നടന്നിട്ടുണ്ടെങ്കിലും ഇത് ആദ്യമായാണ് വ്യാവസായിക അടിസ്ഥാനത്തില് സിനിമ നിര്മ്മിക്കപ്പെടുന്നത്
സംസ്കൃത നാടക കലാകാരന് കിരണ്രാജാണ് ചിത്രം നിര്മ്മിച്ചിരിക്കുന്നത്.
വിപിന് ചന്ദ്രന് ചിത്രത്തിന്റെ ക്യാമറയും പ്രദീപ് ശങ്കര് എഡിറ്റിംഗും നിര്വഹിച്ചിരിക്കുന്നു. സംസ്കൃത നാടക സംവിധായക അശ്വതി വിജയനാണ് സംഭാഷണം ചിട്ടപ്പെടുത്തിയിരിക്കുന്നത്. കലാ സംവിധാനം അനില് കാട്ടാക്കടയും വസ്ത്രാലങ്കാരം വിനിത കെ തമ്പാന്, മുരളീ ചന്ദ്ര എന്നിവര് ചേര്ന്നുമാണ് നിര്വഹിച്ചിരിക്കുന്നത്. പുതുമുഖം ജിഷ്ണു വി നായരാണ് ചിത്രത്തില് നായകനായി എത്തുന്നത്. മോഡല് പാര്വതി. വി നായരാണ് നായിക. പ്രദീപ് കുമാര്, രശ്മി കൈലാസ്, ജ്വാല എസ് പരമേശ്വര്, ഷാരണി, രഘുനാഥ് സോപാനം എന്നിവര് ചിത്രത്തില് പ്രധാന വേഷങ്ങള് അവതരിപ്പിച്ചിരിക്കുന്നു.
സമ്പന്നമായ ഒരു ചലച്ചിത്ര സാംസ്കാരിക അടിത്തയും ചലച്ചിത്ര വ്യവസായവും ഉള്ള ഷാങ്ഹായ് നഗരത്തില് നടക്കുന്ന മേളയില് ചിത്രം പ്രദര്ശിപ്പിക്കാനായത് അഭിമാനം നല്കുന്ന കാര്യമാണെന്ന് യദു പറഞ്ഞു.
