കൊച്ചി : അങ്കമാലിയില് കെഎസ്ആര്ടിസി ലോഫ്ളോര് ബസും ടൂറിസ്റ്റ് ബസും കൂട്ടിയിടിച്ച് ബസ് യാത്രക്കാരി മരിച്ചു. മലപ്പുറം ചെമ്മാട് സ്വദേശി സെലീന ഷാഫി(38) ആണ് മരിച്ചത്. സൗദിയില് നിന്നെത്തിയ സെലീന വീട്ടിലേക്ക് പോകും വഴിയാണ് അപകടത്തില്പ്പെടുന്നത്. ബെംഗളൂരുവില് നിന്നും പത്തനംതിട്ടയിലേക്ക് പോകുകയായിരുന്നു ടൂറിസ്റ്റ് ബസും കൊച്ചിയില് നിന്നും കോഴിക്കോട്ടേക്ക് പോകുകയായിരുന്ന ലോ ഫ്ളോര് ബസുമാണ് അപകടത്തില്പ്പെട്ടത്.
രാവിലെ 5.45 ഓടെയാണ് അപകടം സംഭവിക്കുന്നത്. അങ്കമാലി കെഎസ്ആര്ടിസി ബസ് സ്റ്റാന്ഡിലേക്ക് കയറുകയായിരുന്ന കെഎസ്ആര്ടിസി ലോ ഫ്ളോര് ബസിന് പിന്നില് ടൂറിസ്റ്റ് ബസ് ഇടിച്ചു കയറുകയായിരുന്നു. ഇടിയുടെ ആഘാതത്തില് കെഎസ്ആര്ടിസി ബസിന്റെ പിന്വശത്തെ ചില്ല് തകര്ന്ന് സെലീന റോഡിലേക്ക് തലയിടിച്ച് വീഴുകയായിരുന്നു.
ഗുരുതരമായി പരിക്കേറ്റ സെലീനയെ ഉടന് അങ്കമാലിയിലെ സ്വകാര്യ ആശുപത്രിയിലെത്തിച്ചെങ്കിലും ജീവന് രക്ഷിക്കാനായില്ല. സൗദിയില് നിന്നും ശനിയാഴ്ച രാത്രിയിലെ വിമാനത്തിലാണ് സെലീന കൊച്ചിയില് എത്തിയത്. അവിടെ നിന്നും ബന്ധുക്കള്ക്കൊപ്പം നാട്ടിലേക്ക് മടങ്ങുകയായിരുന്നു. ബസില് ഒപ്പമുണ്ടായിരുന്ന സെലീനയുടെ ബന്ധുവിന് അപകടം നേരില് കണ്ടതിനെ തുടര്ന്ന് ദേഹാസ്വാസ്ഥ്യമുണ്ടായി ഇവരെ പിന്നീട് ആശുപത്രിയിലേക്ക് മാറ്റി.
