തിരുവനന്തപുരം : വര്‍ക്കലയിലെ ഹോട്ടലില്‍ മദ്യപച്ച് ബഹളം വെച്ചതിനെ ചോദ്യം ചെയ്ത് രണ്ട് പോലീസുകാര്‍ക്ക് മര്‍ദ്ദനം. രണ്ട് യുവാക്കള്‍ മദ്യപിച്ച് ഹോട്ടല്‍ ജീവനക്കാരുമായി വാക്കുതര്‍ക്കത്ത്ല്‍ ഏര്‍പ്പെടുകയും അത് സംഘര്‍ഷത്തിലേക്ക് നീങ്ങിയതോടെയാണ് പോലീസ് ഇടപെടുന്നതിനിടെ അവര്‍ക്കും മര്‍ദ്ദനമേല്‍ക്കുകയായിരുന്നു.
വര്‍ക്കല ടൂറിസം പോലീസ് ഉദ്യോഗസ്ഥരായ ജോജിന്‍ രാജ്, സാംജിത്ത് എന്നിവര്‍ക്കാണ് മര്‍ദ്ദനമേറ്റത്. ശനിയാഴ്ച രാത്രി 11 മണിയോടെയാണ് സംഭവം നടന്നത്. മദ്യപിച്ച് ബഹളമുണ്ടാക്കി രണ്ട് യുവാക്കള്‍ ഹോട്ടലിലെ ജീവനക്കാരുമായി സംഘര്‍ഷത്തില്‍ ഏര്‍പ്പെടുകയായിരുന്നു. തുടര്‍ന്ന് പോലീസെത്തി സംഘര്‍ഷത്തില്‍ ഇടപെട്ടതോടെ യുവാക്കള്‍ ഹോട്ടല്‍ ജീവനക്കാരെ ഒഴിവാക്കി പോലീസിനെ മര്‍ദ്ദിക്കുകയായിരുന്നു. പോലീസുകാരുടെ പക്കലുണ്ടായിരുന്ന വയര്‍ലസും ഇവര്‍ തട്ടിയെടുത്തു.
വിവരമറിഞ്ഞ് കൂടുതല്‍ പോലീസുകാര്‍ സ്ഥലത്തെത്തിയാണ് മദ്യപാനികളെ പിടികൂടിയത്. വെട്ടൂര്‍ സ്വദേശിയായ ധീരജ്, വെമ്പായം ഇരിഞ്ചയം സ്വദേശി രതീഷ് എന്നിവരാണ് സംഘര്‍ഷമുണ്ടാക്കിയത്. പോലീസ് ഇവരെ കസ്റ്റഡിയില്‍ എടുത്തു. പരിക്കേറ്റ പോലീസുകാരെ പാരിപ്പള്ളി മെഡിക്കല്‍ കോളേജില്‍ ചികിത്സയ്‌ക്കായി പ്രവേശിപ്പിച്ചു. ജോജിന്‍ രാജിന്റെ കാലിന് പൊട്ടലുണ്ട്. സാംജിത്തിന്റെ മുഖത്തും പരിക്കേറ്റിട്ടുണ്ട്.
പ്രതികരിക്കാൻ ഇവിടെ എഴുതുക: