ബെംഗളൂരു : ശിവമോഗയില്‍ മൂര്‍ഖന്‍പാമ്പിനെ പിടികൂടിയശേഷം ആളുകളുടെ മുന്നില്‍ വെച്ച് ചുംബിച്ച യുവാവിനെ പാമ്പ് കൊത്തി. ഭദ്രാവതി സ്വദേശിയായ അലക്സിനാണ് കടിയേറ്റത്. പരിക്കേറ്റ ഇയാളെ ആശുപത്രിയില്‍ പ്രവേശിപ്പിച്ചിരിക്കുകയാണ്. ഭദ്രാവതി ബൊമ്മനകട്ടെയിലാണ് സംഭവം.
പ്രദേശത്തു നിന്ന് അലക്സ് പാമ്പിനെ പിടികൂടി ആള്‍ക്കൂട്ടത്തിന് മുന്നില്‍വെച്ച് തലയില്‍ ചുംബിക്കാന്‍ ശ്രമിച്ചു. ഇതോടെ പാമ്പ് അലക്സിന്റെ ചുണ്ടില്‍ തിരിഞ്ഞുകൊത്തുകയായിരുന്നു. തുടര്‍ന്ന് അലക്സിന്റെ കൈയില്‍നിന്ന് പാമ്പ് വഴുതി പോവുകയായിരുന്നു. സംഭവത്തിന്റെ വീഡിയോ ദൃശ്യങ്ങളും സാമൂഹികമാധ്യമങ്ങളില്‍ പ്രചരിക്കുന്നുണ്ട്.
കടിയേറ്റ അലക്സ് അപകടനില തരണംചെയ്തതായി ആശുപത്രി വൃത്തങ്ങള്‍ അറിയിച്ചു. വീഡിയോ പ്രചരിച്ചതോടെ യുവാവിനെതിരെ സമൂഹ മാധ്യമങ്ങളില്‍ രൂക്ഷ വിമര്‍ശനങ്ങളാണ് ഉയരുന്നത്.
പ്രതികരിക്കാൻ ഇവിടെ എഴുതുക: