ചെന്നൈ: ദേശീയ ടീമിന്റെ നായകനായി സഞ്ജു സാംസണിന് വിജയത്തുടക്കം. ന്യൂസിലന്‍ഡ് എയ്‌ക്കെതിരായ ആദ്യ ഏകദിനത്തില്‍ ഇന്ത്യ എയ്‌ക്ക് ഏഴ് വിക്കറ്റിന്റെ ആധികാരിക ജയം. സ്‌കോര്‍: ന്യൂസിലന്‍ഡ് എ-167 (40.2/50), ഇന്ത്യ എ-170/3 (31.5/50).
ടോസ് നേടി ന്യൂസിലന്‍ഡിനെ ബാറ്റിങ്ങിന് വിടാനുള്ള സഞ്ജുവിന്റെ തീരുമാനം ബൗളര്‍മാര്‍ ശരിവച്ചു. ബൗളിങ് തുടങ്ങിയ ഷാര്‍ദുല്‍ താക്കൂറും കുല്‍ദീപ് സെന്നും അവരുടെ മുന്‍നിരയെ തകര്‍ത്തെറിഞ്ഞു. ഷാര്‍ദുല്‍ 8.2 ഓവറില്‍ 32 റണ്‍സിന് നാലു വിക്കറ്റെടുത്തപ്പോള്‍ കുല്‍ദീപിന് ഏഴോവറില്‍ 30 റണ്‍സിന് മൂന്ന് വിക്കറ്റ്. ഒരു വിക്കറ്റ് കുല്‍ദീപ് യാദവിന്. രണ്ട് പേരെ വിക്കറ്റിനു പിന്നില്‍ ക്യാച്ചെടുത്ത് സഞ്ജു തന്റെ ബൗളര്‍മാര്‍ക്ക് മികച്ച പിന്തുണയും നല്കി. എട്ടാമനായെത്തിയ മൈക്കിള്‍ റിപ്പണാണ് (61) കിവികളുടെ ടോപ് സ്‌കോറര്‍. പത്താമനായെത്തിയ ജോ വാക്കര്‍ (36), ക്യാപ്റ്റന്‍ റോബര്‍ട്ട് ഒ ഡൊന്നെല്‍ (22) എന്നിവരും രണ്ടക്കം കണ്ടു.
മറുപടി തുടങ്ങിയ ഇന്ത്യക്കായി ഓപ്പണ്‍ ചെയ്തത് പൃഥ്വി ഷായും (17), ഋതുരാജ് ഗെയ്ക്‌വാദും (41). പൃഥ്വി വേഗം വീണെങ്കിലും പിന്നെയെത്തിയ രാഹുല്‍ ത്രിപാഠി (31) സ്‌കോറിങ്ങില്‍ പങ്കുചേര്‍ന്നു. 101 റണ്‍സായപ്പോഴേക്കും ഋതുരാജും രാഹുലും മടങ്ങിയെങ്ങിലും സഞ്ജുവും (29 നോട്ടൗട്ട്) രജത് പടീദാറും (45 നോട്ടൗട്ട്) ജയം പൂര്‍ത്തിയാക്കി. സിക്‌സറടിച്ച് സഞ്ജുവാണ് മത്സരം പൂര്‍ത്തിയാക്കിയത്. ലോഗന്‍ വാന്‍ ബീക്ക്, മാത്യു ഫിഷര്‍, മൈക്കിള്‍ റിപ്പണ്‍ എന്നിവര്‍ക്ക് ഓരോ വിക്കറ്റ്. ഞായറാഴ്ചയാണ് രണ്ടാം മത്സരം.
പ്രതികരിക്കാൻ ഇവിടെ എഴുതുക: