കൊളംബോ : ആഭ്യന്തര പ്രശ്‌നങ്ങളെ തുടര്‍ന്ന് രാജ്യം വിട്ട മുന്‍ പ്രസിഡന്റ് ഗോതാബായ രാജപക്സെ ശ്രീലങ്കയില്‍ തിരിച്ചെത്തി. സാമ്പത്തിക പ്രതിസന്ധിയെ തുടര്‍ന്ന് ജനങ്ങള്‍ സര്‍ക്കാരിനെതിരെ തിരിഞ്ഞതോടെയാണ് ഗോതാബായ രാജ്യം വിട്ടത്. വെള്ളിയാഴ്ച അര്‍ദ്ധരാത്രിയോടെ ഇയാള്‍ കൊളംബോയില്‍ തിരിച്ചെത്തുകയായിരുന്നു.
ഏഴാഴ്ച മുമ്പാണ് രാജപക്സെ രാജ്യം വിട്ടത്. അര്‍ദ്ധരാത്രി കൊളംബോ വിമാനത്താവളത്തിലെത്തിയ ഗോതാബായയെ സ്വീകരിക്കാന്‍ അദ്ദേഹത്തിന്റെ പാര്‍ട്ടിയില്‍ നിന്നുള്ള മന്ത്രിമാരും എംപിമാരും എത്തിയിരുന്നു. അവിടെ നിന്നും പോലീസ് കാവലിലാണ് ഗോതാബായയെ വസതിയിലേക്ക് എത്തിച്ചത്. മുന്‍ പ്രസിഡന്റ് എന്ന നിലയില്‍ സര്‍ക്കാര്‍ കൊളംബോയില്‍ അനുവദിച്ച വസതിയിലാണ് ഇപ്പോള്‍ ഗോതാബായ ഉള്ളത്. നിലവില്‍ ഗോതാബായക്കെതിരെ രാജ്യത്ത് കേസുകളൊന്നും രജിസ്റ്റര്‍ ചെയ്തിട്ടില്ല.
ജൂലൈ ഒമ്പതിന് ജനകീയ പ്രക്ഷോഭകര്‍ പ്രസിഡന്റിന്റെ കൊട്ടാരം കൈയേറുന്നതിന് തൊട്ടുമുമ്പായാണ് അംഗരക്ഷകര്‍ക്കും കുടുംബത്തിനുമൊപ്പം ഗോതാബായ രാജ്യംവിട്ടത്. മാലിദ്വീപിലേക്ക് കടന്ന അദ്ദേഹം പിന്നീട് സിംഗപ്പൂരിലത്തിയ ശേഷമാണ് പ്രസിഡന്റ് സ്ഥാനം രാജിവെച്ചത്. തുടര്‍ന്ന് അദ്ദേഹം തായ്ലന്‍ഡിലേക്ക് പോയി. തനിക്ക് തിരിച്ചുവരവിന് അവസരം ഒരുക്കണമെന്ന് രാജപക്സെ ശ്രീലങ്കയുടെ പുതിയ പ്രസിഡന്റ് റനില്‍ വിക്രമസിംഗെയോട് അടുത്തിടെ അപേക്ഷിച്ചിരുന്നു. ഇതിന്റെ അടിസ്ഥാനത്തിലാണ് മടക്കം.
തിരിച്ചെത്തിയ ഗോതാബയയ്‌ക്ക് പ്രത്യേക സുരക്ഷയൊരുക്കുമെന്ന് ശ്രീലങ്കന്‍ സര്‍ക്കാര്‍ വൃത്തങ്ങള്‍ അറിയിച്ചു. ശ്രീലങ്കന്‍ സൈന്യത്തില്‍ നിന്നും പോലീസില്‍ നിന്നുമുള്ള കമാന്‍ഡോകള്‍ അടങ്ങിയ പ്രത്യേക സംഘത്തിനെയാണ് ഇതിനായി നിയോഗിച്ചിരിക്കുന്നത്.
ജൂലായിയില്‍ സിംഗപ്പൂരിലെത്തിയ ഗോതബായ രാജപക്സെക്ക് സിംഗപ്പൂര്‍ സര്‍ക്കാര്‍ വിസാ കാലാവധി നീട്ടി നല്‍കാത്തതിനെ തുടര്‍ന്നാണ് അദ്ദേഹം ഓഗസ്റ്റില്‍ തായ്ലന്‍ഡിലേക്ക് പോയത്. ബാങ്കോക്കിലെ ഹോട്ടലില്‍ താമസിച്ചിരുന്ന ഗോതബായയോട് പുറത്തിറങ്ങരുതെന്ന് തായ്ലന്‍ഡ് സര്‍ക്കാര്‍ കര്‍ശന നിര്‍ദേശം നല്‍കിയിരുന്നു. അദ്ദേഹത്തിന്റെ ജീവന് ഭീഷണിയുണ്ടെന്ന റിപ്പോര്‍ട്ടുകളെ തുടര്‍ന്നായിരുന്നു ഇത്. ഇതേത്തുടര്‍ന്ന് ബാങ്കോക്കില്‍ തടവുകാരനെ പോലെയായിരുന്നു താമസിച്ചിരുന്നത്.
പ്രതികരിക്കാൻ ഇവിടെ എഴുതുക: