കണ്ണൂര്‍: കുറഞ്ഞ ചെലവില്‍ വിനോദസഞ്ചാര കേന്ദ്രങ്ങളെ ബന്ധിപ്പിച്ചുള്ള കെഎസ്ആര്‍ടിസിയുടെ ടൂറിസം യാത്രയിലൂടെ ആറ് മാസത്തിനിടെ ജില്ലയില്‍ ലഭിച്ചത് 26 ലക്ഷം രൂപയുടെ വരുമാനം. ഈ വര്‍ഷം ഫെബ്രുവരി മുതല്‍ ആഗസ്റ്റ് 31 വരെ 71 വിനോദ യാത്രകളാണ് ബജറ്റ് ടൂറിസം സെല്ലിന്റെ നേതൃത്വത്തില്‍ സംഘടിപ്പിച്ചത്. 41 ഏകദിന യാത്രകളും 30 ദ്വിദിന യാത്രകളും ഇതില്‍ ഉള്‍പ്പെടും.
കണ്ണൂര്‍-പൈതല്‍മല, കണ്ണൂര്‍-വയനാട് എന്നീ ഏകദിന യാത്രകളും കണ്ണൂര്‍-മൂന്നാര്‍, കണ്ണൂര്‍-വാഗമണ്‍-കുമരകം, കണ്ണൂര്‍-തിരുവനന്തപുരം-കുമരകം എന്നിങ്ങനെ ദ്വിദിന, ത്രിദിന പാക്കേജുകളാണ് നിലവിലുള്ളത്. പൈതല്‍മല-ഏഴരക്കുണ്ട് വെള്ളച്ചാട്ടം-പാലക്കയംതട്ട് എന്നീ കേന്ദ്രങ്ങളെ കോര്‍ത്തിണക്കിയ ഒരു ദിവസത്തെ യാത്രക്ക് 750 രൂപയാണ് ചെലവ്. കണ്ണൂര്‍-തുഷാരഗിരി വെള്ളച്ചാട്ടം-എന്‍ ഊര് ആദിവാസി പൈതൃക ഗ്രാമം-ലക്കിടി വ്യൂ പോയിന്റ്-ഹണി മ്യൂസിയം-പൂക്കോട് തടാകം എന്നിവ ഉള്‍പ്പെട്ട യാത്രക്ക് 1140 രൂപയാണ് നിരക്ക്. രണ്ട് ദിവസത്തെ മൂന്നാര്‍ പാക്കേജിന് 2050 രൂപയും മൂന്ന് ദിവസത്തെ പാക്കേജിന് 2700 രൂപയുമാണ്. ഏറ്റവും കൂടുതല്‍ വരുമാനം ലഭിച്ചതും ഈ പാക്കേജില്‍ നിന്നാണ്. 14 ലക്ഷം രൂപ. കണ്ണൂര്‍-വാഗമണ്‍-കുമരകം, തിരുവനന്തപുരം-കുമരകം, നെഫര്‍റ്റിറ്റി ആഡംബര കപ്പലിലെ അഞ്ച് മണിക്കൂര്‍ യാത്ര തുടങ്ങിയ പാക്കേജുകളും യാത്രക്കാര്‍ക്കായി ഒരുക്കിയിട്ടുണ്ട്.
സമൂഹത്തിന്റെ വിവിധ മേഖലകളില്‍ നിന്നുള്ള നിരവധിപേരാണ് കെഎസ്ആര്‍ടിസി ഒരുക്കുന്ന വിനോദയാത്രയുടെ ഭാഗമാകുന്നത്. 40 വയസ്സിന് മുകളില്‍ പ്രായമുള്ളവരാണ് വലിയ വിഭാഗം യാത്രക്കാര്‍. സ്ത്രീകളും കൂടുതലായി ഇതിന്റെ ഭാഗമാകുന്നുണ്ട്. വളരെ വേഗത്തിലാണ് ബുക്കിംഗ് പൂര്‍ത്തിയാകുന്നത്. വരും ദിനങ്ങളില്‍ പാലക്കാട്-സൈലന്റ് വാലി, ബേക്കല്‍-റാണിപുരം ഹില്‍സ്റ്റേഷന്‍, ഊട്ടി, മൈസൂര്‍ തുടങ്ങിയ സ്ഥലങ്ങളിലേക്ക് കണ്ണൂരില്‍ നിന്നും യാത്ര സംഘടിപ്പിക്കാനുള്ള തീരുമാനത്തിലാണ് കെഎസ്ആര്‍ടിസി.
പ്രതികരിക്കാൻ ഇവിടെ എഴുതുക: