മുംബൈ :26/11ലെ മുംബൈ ഭീകരാക്രമണത്തിന് രാജ്യത്ത് വീണ്ടും ആവര്‍ത്തിക്കുമെന്ന് പാക്കിസ്ഥാനില്‍ നിന്നും ഭീഷണി സന്ദേശം. മുംബൈ പോലീസിനാണ് ഈ ഭീഷണി സന്ദേശം ലഭിച്ചിരിക്കുന്നത്. ആറുപേര്‍ ചേര്‍ന്ന് ഇന്ത്യയില്‍ ആക്രണമണം നടത്തുമെന്നും, അവര്‍ ഇന്ത്യക്കാര്‍ തന്നെയാണെന്നുമാണ് ഭീഷണി സന്ദേശം.
വെള്ളിയാഴ്ച രാത്രി മുംബൈ പോലീസിന്റെ വാട്‌സ്ആപ്പ് നമ്പറിലേക്കാണ് ഭീഷണി സന്ദേശം എത്തിയത്. 26/11 ആക്രമണം, ഉദയ്പുര്‍ കൊലപാതകം, സിന്ധു മൂസാവാല കൊലപാതകം എന്നിവയെക്കുറിച്ചു സന്ദേശത്തില്‍ പരാമര്‍ശമുണ്ട്. സമാനമായ രീതിയില്‍ രാജ്യത്ത് ആക്രമണം നടത്തും. ഇന്ത്യയ്‌ക്കു പുറത്താണ് താനിപ്പോള്‍ ഉള്ളത്. ഇന്ത്യയില്‍ തന്നെയുള്ള ആറ് പേര്‍ ചേര്‍ന്ന് മുംബൈയില്‍ ആക്രമണം നടത്തുമെന്നുമാണ് സന്ദേശം.
തുടര്‍ന്ന് നടത്തിയ അന്വേഷണത്തില്‍ പാക്കിസ്ഥാനില്‍ നിന്നുള്ള ഫോണ്‍ നമ്പറാണ് ഇതെന്ന് കണ്ടെത്താനായിട്ടുണ്ട്. സംഭവത്തില്‍ അന്വേഷണം ആരംഭിച്ചതായി മുംബൈ പോലീസ് അറിയിച്ചു. കേന്ദ്ര ഏജന്‍സികളും അന്വേഷണം ആരംഭിച്ചിട്ടുണ്ട്. ഒപ്പം സന്ദേശം വ്യാജമാണോയെന്നും പരിശോധിക്കുന്നുണ്ട്. സംസ്ഥാനത്തെ സുരക്ഷയും കര്‍ശ്ശനമാക്കിയിട്ടുണ്ട്.
മഹാരാഷ്‌ട്രയിലെ റായ്ഗഡ് ജില്ലയില്‍ ആയുധങ്ങളും സ്ഫോടക വസ്തുക്കളുമായെത്തിയ ബോട്ട് കഴിഞ്ഞ ദിവസം പിടികൂടിയിരുന്നു. അതിനു പിന്നാലെയാണ് ഭീഷണി സന്ദേശം ലഭിച്ചിരിക്കുന്നത്. റായ്ഗഡില്‍ നിന്നും എകെ 47 തോക്കുകള്‍ വെടിയുണ്ടകള്‍ അടക്കമുള്ള ആയുധങ്ങളാണ് ബോട്ടില്‍ നിന്നും കണ്ടെടുത്തത്. ഇതു കേന്ദ്രീകരിച്ച് അന്വേഷണം നടന്നുവരികയാണ്.
2008 നവംബര്‍ 26ന് വിവിധ സ്ഥലങ്ങളിലായാണ് ലഷ്‌കര്‍ ഇ തോയ്ബ പാക് ഭീകരര്‍ മുംബൈയില്‍ ആക്രമണം നടത്തിയത്. ഇതില്‍ 166 പേര്‍ കൊല്ലപ്പെടുകയും 300ലധികം പേര്‍ക്ക് പരിക്കേല്‍ക്കുകയും ചെയ്തിരുന്നു.
പ്രതികരിക്കാൻ ഇവിടെ എഴുതുക: