വട്ടവട പുതുക്കടിയില്‍ വീണ്ടും ഉരുള്‍പ്പൊട്ടല്‍; ഒരു വീട് ഭാഗികമായി തകര്‍ന്നു, ആളപായമില്ല

ഇടുക്കി : ശക്തമായ മഴയെ തുടര്‍ന്ന് മൂന്നാര്‍ വട്ടവടയില്‍ വീണ്ടും ഉരുള്‍പ്പൊട്ടി. പുതുക്കടിയിലാണ് ശനിയാഴ്ച ഉരുള്‍പൊട്ടിയ സ്ഥലത്ത് തന്നെയാണ് ഇന്ന് വീണ്ടും ഉരുള്‍പൊട്ടലുണ്ടായത്. അപകടത്തില്‍ ഒരു വീട് ഭാഗീകമായി മണ്ണിനടിയിലായി.  

എന്നാല്‍ ആളപായമില്ല. വെള്ളിയാഴ്ച അര്‍ധരാത്രിയോടെ  കുണ്ടള എസ്റ്റേറ്റ് പുതുക്കുടി ഡിവിഷനില്‍ ഉരുള്‍പൊട്ടലുണ്ടായിരുന്നു. ഇതില്‍ രണ്ട് കടകളും ഒരു ക്ഷേത്രവും മണ്ണിനടിയിലായിരുന്നു. പ്രദേശത്തെ 175 കുടുംബങ്ങളെ മാറ്റിപ്പാര്‍പ്പിച്ചിരിക്കുകയാണ്.  സംഭവസ്ഥലത്ത് ഭൂമിക്കടിയില്‍ നിന്നും ചില മുഴക്കം കേള്‍ക്കുന്നതായി റിപ്പോര്‍ട്ടുണ്ട്. 

അതേസമയം ശക്തമായ മഴയില്‍ സംസ്ഥാന പാത പൂര്‍ണ്ണമായും തകര്‍ന്നതോടെ വട്ടവട ഇപ്പോള്‍ ഒറ്റപ്പെട്ടിരിക്കുകയാണ്. ഈ ഭാഗത്തേക്കുള്ള ഗതാഗതത്തിന് നിയന്ത്രണം ഏര്‍പ്പെടുത്തിയിരിക്കുകയാണ്.