കോഴിക്കോട്: ലൈംഗിക പീഡനക്കേസിലെ പ്രതിയായ സിവിക് ചന്ദ്രന് കേരളത്തില് നിന്ന് മുങ്ങിയെന്ന് പോലീസ്. ഫോണ് സ്വിച്ച്ഡ് ഓഫാണെന്നും അദേഹത്തിന്റെ കോഴിക്കോട് വെസ്റ്റ്ഹില്ലിലുളള വീട്ടിലേക്ക് പലതവണ അന്വേഷണസംഘം എത്തിയെങ്കിലും കണ്ടെത്താനായില്ലെന്നുമാണ് പോലീസ് പറയുന്നത്. തമിഴ്നാട്ടിലേക്ക് കടന്നതായുള്ള സൂചനയും പോലീസ് പങ്കുവെയ്ക്കുന്നുണ്ട്.
യുവ സാഹിത്യകാരിയുടെ പരാതിയില് കഴിഞ്ഞയാഴ്ചയാണ് കൊയിലാണ്ടി പോലീസ് സിവിക് ചന്ദ്രനെതിരെ കേസ് എടുത്തത്. ബലാത്സംഗം, സ്ത്രീത്വത്തെ അപമാനിക്കല് തുടങ്ങിയ വകുപ്പുകള്ക്കൊപ്പം പട്ടികജാതി പട്ടികവര്ഗ്ഗ വിഭാഗങ്ങള്ക്കെതിരായ അതിക്രമ നിയമ പ്രകാരവുമാണ് കേസ്.
കേസെടുത്ത് ഒരാഴ്ച കഴിഞ്ഞിട്ടും സിവിക് ചന്ദ്രന് എവിടെയുണ്ടെന്ന് കണ്ടെത്താന് പോലീസിന് കഴിഞ്ഞിട്ടില്ലെന്നും ഒരാഴ്ചക്കകം നടപടിയെടുത്തില്ലെങ്കില് ഉത്തരമേഖ ഐ.ജി ഓഫീസിന് മുന്നില് പ്രക്ഷോഭം തുടങ്ങുമെന്നും ദളിത് സംഘടനകള് അറിയിച്ചു. ഐ.ജി.യുടെ ഓഫീസ് മുന്നില് കുടില്കെട്ടി സമരം തുടങ്ങാനാണ് ദളിത് സംഘടനകളുടെ തീരുമാനം. പരാതിയില് നടപടി വൈകുന്നതില് ഇടപെടല് ആവശ്യപ്പെട്ട് സാമൂഹിക സാംസ്കാരിക രംഗത്തെ 100 പേര് ഒപ്പുവെച്ച നിവേദനവും മുഖ്യമന്ത്രിക്ക് നല്കിയിട്ടുണ്ട്.
