തൃശൂര്‍: കുന്നംകുളത്ത് യുവതിയെ കെട്ടിയിട്ട് ക്രൂരമായി പീഡിപ്പിച്ച കേസില്‍ ഭര്‍ത്താവും സുഹൃത്തും അറസ്റ്റില്‍. പ്രതികള്‍ യുവതിയെ ക്രൂരമായി പീഡിപ്പിക്കുകയും സ്വകാര്യ ഭാഗങ്ങളില്‍ മുറിവേല്‍പ്പിക്കുകയും ചെയ്തു. സംഭവത്തില്‍ പഴുന്നാന ചെമ്മന്തിട്ട സ്വദേശികളെ കുന്നംകുളം പോലീസ് അറസ്റ്റ് ചെയ്തിട്ടുണ്ട്.
പീഡനത്തിന്റെ ദൃശ്യങ്ങള്‍ ചിത്രീകരിച്ച് സോഷ്യല്‍ മീഡിയ വഴി പ്രചരിപ്പിക്കാന്‍ ശ്രമിച്ചുവെന്നും പ്രതികള്‍ക്കെതിരെ കുറ്റമുണ്ട്. യുവതിയുടെ നഗ്ന ദൃശ്യങ്ങള്‍ മൊബൈലില്‍ പകര്‍ത്തി യുവതിയുടെ കാമുകന് അയച്ചു കൊടുത്തതിനാണ് ഭര്‍ത്താവിനെ അറസ്റ്റ് ചെയ്തിട്ടുള്ളത്. പ്രതി വിദേശത്തേക്ക് രക്ഷപ്പെടാനുള്ള ശ്രമത്തിനിടെയാണ് അറസ്റ്റ്.
കൂട്ട ബലാത്സംഗത്തിനും ദൃശ്യങ്ങള്‍ പ്രചരിപ്പിക്കാന്‍ ശ്രമിച്ചതിന് ഐടി ആക്ട് പ്രകാരവുമാണ് കേസെടുത്തത്. ക്രൂരമായ പീഡനത്തെ തുടര്‍ന്ന് യുവതിക്ക് ഗുരുതരമായി പരിക്കേറ്റിരുന്നു. തുടര്‍ന്ന് യുവതി സ്വകാര്യ ആശുപത്രിയില്‍ ചികിത്സ തേടി. ഇതോടെയാണ് സംഭവം പുറത്തറിയുന്നത്. പോലീസ് നടത്തിയ വിശദമായ അന്വേഷണത്തിലാണ് രണ്ട് പ്രതികളും അറസ്റ്റിലായത്. യുവതിയെ ക്രൂരമായി പീഡിപ്പിക്കുന്ന ദൃശ്യങ്ങള്‍ പകര്‍ത്താന്‍ ഉപയോഗിച്ച മൊബൈല്‍ ഫോണും പെന്‍ ഡ്രൈവ് അടക്കമുള്ള ഉപകരണങ്ങള്‍ പോലീസ് കസ്റ്റഡിയിലെടുത്തു.
യുവതി ഭര്‍ത്താവിന്റെ ബന്ധുവായ യുവാവുമായി അടുപ്പത്തിലായിരുന്നതായും ഇക്കാര്യം അറിഞ്ഞ ഭര്‍ത്താവ് യുവതിയെ കൂട്ട ബലാത്സംഗത്തിന് ഇരയാക്കിയതായും ആക്ഷേപമുണ്ട്. ഗാര്‍ഹിക പീഡനത്തിനും ഭര്‍ത്താവിനെതിരെ കേസ് ചുമത്തിയിട്ടുണ്ട്. ആശുപത്രിയില്‍ ചികിത്സയിലുള്ള യുവതി അപകടനില തരണം ചെയ്തതായി പോലീസ് പറഞ്ഞു. സബ് ഇന്‍സ്‌പെക്ടര്‍ ഷക്കീര്‍ അഹമ്മദ്, ഗോപിനാഥന്‍, സിവില്‍ ഓഫീസര്‍മാരായ ഹംദ്, ഷാനിമോന്‍, രവികുമാര്‍, രതീഷ്‌കുമാര്‍, നിബു നെപ്പോളിയന്‍ എന്നിവരടങ്ങിയ സംഘമാണ് അന്വേഷണം നടത്തിയത്.
പ്രതികരിക്കാൻ ഇവിടെ എഴുതുക: