കൊച്ചി : കൊച്ചി മെട്രോയുടെ പരിസരത്തുള്ള വീടുകള്‍ക്ക് അധിക നികുതി ഏര്‍പ്പെടുത്താന്‍ നീക്കവുമായി സംസ്ഥാന സര്‍ക്കാര്‍. മെട്രോ ലൈനിന് ഇരുവശത്തുമുള്ള ഒരു കിലോമീറ്ററിനകത്തുള്ള വീടുകളുടെ ആഢംബര നികുതി 50 ശതമാനം വര്‍ധിപ്പിക്കാനാണ് തീരുമാനം. ആലുവ മുതല്‍ തൃപ്പൂണിത്തുറ വരെയുള്ള മെട്രോ ലൈനിന്റെ 278 ചതുരശ്ര മീറ്റര്‍ വിസ്തൃതിയില്‍ കൂടുതലുള്ള വീടുകള്‍ക്കാണ് ആഡംബര നികുതി.
അധിക നികുതി ഏര്‍പ്പെടുത്തുന്നതിന്റെ ഭാഗമായി ബന്ധപ്പെട്ട ലാന്‍ഡ് റവന്യു കമ്മിഷണറുടെ നിര്‍ദേശം സംബന്ധിച്ചു വിശദാംശങ്ങള്‍ നല്‍കാന്‍ റവന്യു വകുപ്പ് ഉദ്യോഗസ്ഥരോട് ആവശ്യപ്പെട്ടിട്ടുണ്ട്. സര്‍ക്കാരിന്റെ ഈ തീരുമാനം നടപ്പിലായാല്‍ 278 ചതുരശ്ര മീറ്റര്‍ മുതല്‍ 464 ചതുരശ്ര മീറ്റര്‍ വരെ വിസ്തൃതിയുള്ള കെട്ടിടങ്ങള്‍ക്കാണ് അധിക നികുതിയായി 5,000 രൂപയോളം ആഡംബര നികുതിയായി നല്‍കണം. നിര്‍ദ്ദേശം നടപ്പായാല്‍ ഇവര്‍ക്ക് 7,500 രൂപയായിരിക്കും പുതിയ നികുതി.
464 ചതുരശ്ര മീറ്റര്‍ മുതല്‍ 695 വരെ 10,000 രൂപയും അതിനു മുകളിലേക്ക് 12,500 രൂപയുമാണ് നിലവില്‍ ആഡംബര നികുതി. കണയന്നൂര്‍ താലൂക്കില്‍ 21 വില്ലേജുകളിലായി ആഡംബര നികുതി നല്‍കേണ്ട 5,000 വീടുകളുണ്ട്. എറണാകുളം വില്ലേജില്‍ 450 വീടുകളും എളംകുളം വില്ലേജില്‍ 675 വീടുകളുമുണ്ട്.
പ്രതികരിക്കാൻ ഇവിടെ എഴുതുക: