തൃശൂർ: കിഴുപ്പിള്ളിക്കരയിൽ അമ്മൂമ്മയെയും കൊച്ചുമകനെയും കിണറ്റിൽ മരിച്ച നിലയിൽ കണ്ടെത്തി. വായനശാലക്കു കിഴക്കുവശം പണിക്കശ്ശേരി അജയൻ ഭാര്യ അംബിക (55), ഇവരുടെ മകളുടെ മകൻ ആദിഷ് (7 ) എന്നിവരെയാണ് ബുധനാഴ്ച്ച രാവിലെ 9 മണിയോടെ വീടിനു സമീപത്തെ കിണറ്റിൽ മരിച്ച നിലയിൽ കണ്ടെത്തിയത്. തൊഴിലുറപ്പ് തൊഴിലാളിയായിരുന്ന അംബിക കുറച്ചു നാളായി അസുഖങ്ങളും മറ്റുമായി മാനസിക സമ്മർദ്ദത്തിലായിരുന്നതായി പറയുന്നു.
ആദിഷിന്റെ മാതാപിതാക്കള് വേർപിരിഞ്ഞ് രണ്ടിടത്താണ് താമസം. ആദിഷ്, അംബികയും ഭർത്താവ് അജയനും, മകൻ മണികണ്ഠനും ഒരുമിച്ചായിരുന്നു താമസിച്ചിരുന്നത്. അജയൻ രാവിലെ പണിക്കു പോയതിന് ശേഷമാണ് സംഭവമെന്ന് കരുതുന്നു. രാവിലെ രണ്ടു പേരെയും കാണാതായതിനെ തുടർന്ന് നടത്തിയ തിരച്ചിലിൽ കിണറ്റിൽ ചാടി മരിക്കാൻ പോകുന്നു എന്നെഴുതി വച്ച അംബികയുടെ എഴുത്ത് കണ്ടെത്തി. തുടർന്നാണ് കിണറ്റിൽ രണ്ടു പേരുടെയും മൃതദേഹം കണ്ടെത്തിയത്. അന്തിക്കാട് പോലീസും , നാട്ടിക ഫയർഫോഴ്സും, നാട്ടുകാരും ചേർന്നാണ് മൃതദേഹങ്ങൾ പുറത്തെടുത്തത്.
അന്തിക്കാട് എസ്എച്ച്ഒ അനീഷ് കരീം, എസ്ഐ കെ.എച്ച്. റെനീഷ് എന്നിവരുടെ നേതൃത്വത്തിൽ മേൽനടപടികൾ സ്വീകരിച്ചു.
