ആലപ്പുഴ : പോലീസ് ക്വാര്ട്ടേഴ്സില് മക്കളെ കൊന്ന് അമ്മ ആത്മഹത്യ ചെയ്തത് ഭര്ത്താവ് റെനീസില് നിന്നുള്ള ഗുരുതര പീഡനം മൂലമെന്ന് കകണ്ടെത്തല്. സിവില് പോലീസ് ഉദ്യോഗസ്ഥനായ റെനീസ് സ്ത്രീധനത്തിനായി ഭാര്യ നജ്ലയെ നിരന്തരം പീഡിപ്പിച്ചിരുന്നെന്നും റിമാന്ഡ് റിപ്പോര്ട്ടില് പറയുന്നുണ്ട്.
വിവാഹ സമയത്ത് 40 പവനും 10 ലക്ഷം രൂപയും പള്സര് ബൈക്കും സ്ത്രീധനമായി നജ്ലയുടെ വീട്ടുകാര് നല്കിയിരുന്നു. എന്നാല് കൂടുതല് സ്ത്രീധനം ആവശ്യപ്പെട്ട് നജ്ലയെ പല തവണ റെനീസ് വീട്ടിലേക്ക് തിരിച്ചയച്ചു. ഇതോടെ നജ്ലയുടെ വീട്ടുകാര് പലപ്പോഴായി 20 ലക്ഷം രൂപ നല്കിയിട്ടുണ്ട്.
റെനീസ് പുറത്ത് പോകുമ്പോള് നജ് ലയെ മുറിയില് പൂട്ടിയിടുമായിരുന്നു. പുറം ലോകവുമായി ബന്ധപ്പെടാന് നജ്ലയെ അനുവദിച്ചില്ല. മൊബൈല് ഫോണ് പോലും സ്വന്തമായി ഉപയോഗിക്കാന് അനുവദിച്ചിരുന്നില്ല. പല സ്ത്രീകളുമായും റെനീസിന് അടുത്ത ബന്ധം ഉണ്ടായിരുന്നു. ബന്ധുവായ ഒരു സ്ത്രീയെ കല്യാണം കഴിക്കാന് നജ്ലയില് റെനീസ് നിരന്തരം സമ്മര്ദ്ദം ചെലുത്തി. റെനീസിന്റെ മാനസിക ശാരീര പീഡനങ്ങളാണ് നജ്ലയെ ആത്മഹത്യയിലേക്കെത്തിച്ചതെന്നും റിമാന്ഡ് റിപ്പോര്ട്ടില് പറയുന്നുണ്ട്.
വണ്ടാനം മെഡിക്കല് കോളേജ് ഔട്ട് പോസ്റ്റിലാണ് റനീസിന് ജോലി. എട്ടുമണിക്ക് ജോലിക്ക് പോയ റെനീസ് രാവിലെ തിരികെ എത്തിയപ്പോഴാണ് മൃതദേഹങ്ങള് കാണുന്നത്. കുട്ടികളെ കൊലപ്പെടുത്തിയ ശേഷം നജില ആത്മഹത്യ ചെയ്യുകയായിരുന്നുവെന്ന് പൊലീസ് പറഞ്ഞു. ഒന്നരവയസുള്ള മലാലയെ വെള്ളത്തില് മുക്കി കൊലപ്പെടുത്തിയ ശേഷം ടിപ്പു സുല്ത്താനെ ഷാള് മുറുക്കി ശ്വാസം മുട്ടിക്കുകയായിരുന്നു.
