ശ്രീനഗര്‍ : പുല്‍വാമയില്‍ കഴിഞ്ഞ ദിവസമുണ്ടായ ഏറ്റുമുട്ടലില്‍ രണ്ട് ഭീകരരെ വധിച്ചതായി സൈന്യം. ഐജാസ് ഹഫീസ്, ഷാഹിദ് അയൂബ് എന്നിവരെയാണ് വധിച്ചത്. അല്‍ ബദര്‍ ഭീകരരാണ് ഇവര്‍. രണ്ട് തോക്കുകളും ഇവരുടെ പക്കല്‍ നിന്നും കണ്ടെടുത്തിട്ടുണ്ട്.
ഭീകരാക്രമണത്തില്‍ ഒരു സൈനികന് പരിക്കേല്‍ക്കുകയും ചെയ്തിരുന്നു. പോലീസിന്റെയും സൈന്യത്തിന്റേയും സംയുക്ത സംഘം മിതിഗ്രാം മേഖലയില്‍ നടത്തിയ തെരച്ചിലിലാണ് ഭീകരരെ കണ്ടെത്തിയത്. ഇതിനു പിന്നാലെ ഭീകരര്‍ വെടിയുതിര്‍ക്കുകയും സുരക്ഷാ സൈന്യം പ്രത്യാക്രമണം നടത്തുകയുമായിരുന്നു. ഈ വര്‍ഷം മാര്‍ച്ച് ഏപ്രില്‍ മാസങ്ങളില്‍ കുടിയേറ്റ തൊഴിലാളികള്‍ക്കെതിരായി നടന്ന ആക്രമണത്തില്‍ ഇവര്‍ക്ക് പങ്കുണ്ടായിരുന്നെന്നാണ് പോലീസിന്റെ വിലയിരുത്തല്‍.
24ന് പ്രധാനമന്ത്രി സന്ദര്‍ശിക്കാനിരിക്കെ ജമ്മു കശ്മീരിലെ മിര്‍ഹാമയില്‍ 23ാം തിയതി ഭീകരരും ഇന്ത്യന്‍ സൈന്യവും തമ്മില്‍ ഏറ്റുമുട്ടല്‍ ഉണ്ടായിരുന്നു. പ്രധാനമന്ത്രി സന്ദര്‍ശിക്കുന്ന പല്ലി ഗ്രാമത്തില്‍ നിന്ന് ഇരുപത് കിലോമീറ്റര്‍ അകലെ സിഐഎസ്എഫ് ബസിന് നേരെയും ആക്രമണം നടന്നിരുന്നു. തുടര്‍ന്ന് നടന്ന തെരച്ചിലിനിടെ രണ്ട് ചാവേറുകള്‍ ഉള്‍പ്പടെ ആറു ഭീകരരെ സൈന്യം വധിച്ചു.
പ്രതികരിക്കാൻ ഇവിടെ എഴുതുക: