പാലക്കാട്: കൊല്ലങ്കോട് പതിനാറുകാരിയായ പെണ്‍കുട്ടിയെ വീട്ടിലേക്ക് വിളിച്ചു വരുത്തി തീകൊളുത്തി കൊല്ലാന്‍ ശ്രമം. ഗുരുതരമായി പൊള്ളലേറ്റ് യുവാവും പെണ്‍കുട്ടിയും ആശുപത്രിയില്‍. ഞായറാഴ്ച രാവിലെയാണ് സംഭവം. കിഴക്കേഗ്രാമം സ്വദേശിനിയായ 16 കാരിക്കാണ് പൊള്ളലേറ്റത്. പ്രദേശവാസിയായ ബാലസുബ്രഹ്‌മണ്യം(23) പിറന്നാള്‍ ആണെന്ന് പറഞ്ഞ് പെണ്‍കുട്ടിയെ വീട്ടിലേക്ക് വിളിച്ചുവരുത്തി തീകൊളുത്തുകയായിരുന്നു.
ബാലസുബ്രഹ്‌മണ്യവും പെണ്‍കുട്ടിയും ഏറെനാളായി പ്രണയത്തിലായിരുന്നുവെന്നാണ് നാട്ടുകാര്‍ പറയുന്നത്. അടുത്തിടെ ഇവരുടെ ബന്ധത്തെ വീട്ടുകാര്‍ എതിര്‍ക്കുകയും ഇതില്‍ നിന്നും പിന്തിരിപ്പിക്കാന്‍ ശ്രമിക്കുകയും ചെയ്തു. ഞായറാഴ്ച രാവിലെ പിറന്നാളെന്ന് പറഞ്ഞ് പെണ്‍കുട്ടിയെ ഇയാള്‍ വീട്ടിലേക്ക് വിളിച്ചു വരുത്തുകയും മുറിയില്‍വെച്ച് പെണ്‍കുട്ടിക്ക് നേരെ തീ കൊളുത്തുകയുമായിരുന്നു.
സംഭവസമയം യുവാവിന്റെ അമ്മയും ഇളയസഹോദരനും മാത്രമാണ് വീട്ടിലുണ്ടായിരുന്നത്. മുറിയില്‍നിന്ന് തീയും പുകയും ഉയര്‍ന്നതോടെയാണ് അടുക്കളയിലായിരുന്ന അമ്മയും സമീപവാസികളും സംഭവമറിഞ്ഞത്. തുടര്‍ന്ന് തീയണച്ച ശേഷം ഇരുവരെയും ആശുപത്രിയിലേക്ക് കൊണ്ടുപോവുകയായിരുന്നു. ഇരുവരെയും തൃശ്ശൂര്‍ മെഡിക്കല്‍ കോളേജ് ആശുപത്രിയിലും പിന്നീട് എറണാകുളത്തെ സ്വകാര്യ ആശുപത്രിയിലും പ്രവേശിപ്പിച്ചു.
പ്രണയ ബന്ധത്തില്‍ നിന്നും പിന്തിരിപ്പിക്കാനുള്ള ശ്രമങ്ങളെ തുടര്‍ന്ന് ബാലസുബ്രഹ്‌മണ്യം പെണ്‍കുട്ടിയെ തീകൊളുത്തിയ ശേഷം ആത്മഹത്യ ചെയ്യാന്‍ ശ്രമിച്ചത് ആയിരിക്കുമെന്നാണ് പ്രദേശ വാസികള്‍ പറയുന്നത്. അതേസമയം പെണ്‍കുട്ടിയുമായുള്ള ബന്ധത്തെക്കുറിച്ച് മകന്‍ ഒന്നും പറഞ്ഞിട്ടില്ലെന്നും പെണ്‍കുട്ടി എങ്ങനെയാണ് വന്നതെന്ന് അറിയില്ലെന്ന് ബാലസുബ്രഹ്‌മണ്യത്തിന്റെ അമ്മ പറഞ്ഞു.
പ്രതികരിക്കാൻ ഇവിടെ എഴുതുക: