മെല്ബണ്: ഇന്ത്യയുമായുള്ള പുതിയ വ്യാപാര കരാര് ആഘോഷിക്കാന് ഇന്ത്യന് പ്രധാനമന്ത്രി നരേന്ദ്ര മോദിക്ക് ഇഷ്ടപ്പെട്ട വിഭവമുണ്ടാക്കി ഓസ്ട്രേലിയന് പ്രധാനമന്ത്രി സ്കോട്ട് മോറിസണ്. തന്റെ ഫേസ്ബുക്ക് അക്കൗണ്ഡിലൂടെയാണ് അദ്ദേഹം ഫോട്ടോകള് പങ്കുവച്ചത്. എന്റെ പ്രിയപ്പെട്ട സുഹൃത്താണ് മോദിയെന്നും സ്കോട്ട് മോറിസണ് ഇന്ത്യന് പ്രധാനമന്ത്രിയെ വിശേഷണം ചെയ്തു.
മോദിക്ക് ഏറ്റവുമിഷ്ടപ്പെട്ട കിച്ഡിയാണ് സ്കോട്ട് മോറിസണ് ഉണ്ടാക്കിയത്. ‘ഇന്ത്യയുമായി ഞങ്ങളുണ്ടാക്കിയ പുതിയ വ്യാപാര കരാര് ആഘോഷിക്കാന് വേണ്ടി, കറി നൈറ്റ് ടുനൈറ്റിന് വേണ്ടി ഇന്ന് ഞാനുണ്ടാക്കിയ കറികളെല്ലാം എന്റെ പ്രിയപ്പെട്ട സുഹൃത്ത് നരേന്ദ്ര മോദിയുടെ ഗുജറാത്ത് പ്രവിശ്യയില് നിന്നുള്ളതാണ്, അദ്ദേഹത്തിന്റെ പ്രിയപ്പെട്ട കിച്ഡിയടക്കം,” മോറിസണ് പറഞ്ഞു. അരിയും പരിപ്പുമുപയോഗിച്ച് ഉണ്ടാക്കുന്ന വിഭവമാണ് കിച്ഡി.
ഏപ്രില് രണ്ടിനായിരുന്നു ഇന്ത്യയും ഓസ്ട്രേലിയയും തമ്മില് ഇക്കണോമിക് കോപറേഷന് ആന്ഡ് ട്രേഡ് എഗ്രിമെന്റ് ഒപ്പുവെച്ചത്. ഇന്ത്യയില് നിന്നും ഓസ്ട്രേലിയയിലേക്ക് കയറ്റുമതി ചെയ്യുന്ന ഉല്പന്നങ്ങളില് 96 ശതമാനത്തിനും സീറോ ഡ്യൂട്ടി ആക്സസ് നല്കുന്നതാണ് കരാറാണിത്.
