ന്യൂദല്‍ഹി : നിയമ വിരുദ്ധമായ ഉള്ളടക്കങ്ങളുള്ള പോസ്റ്റുകള്‍ നീക്കാന്‍ സമൂഹ മാധ്യമങ്ങള്‍ക്ക് സാധിക്കും. എന്നാല്‍ മുന്‍കൂര്‍ നോട്ടീസ് നല്‍കാതെ ഏകപക്ഷീയമായി അക്കൗണ്ടുകള്‍ സസ്പെന്ഡ് ചെയ്യാന്‍ സമൂഹ മാധ്യമങ്ങള്‍ക്ക് അധികാരമില്ലെന്ന് കേന്ദ്രസര്‍ക്കാര്‍. അക്കൗണ്ടുകള്‍ സസ്പെന്ഡ് ചെയ്ത ട്വിറ്ററിനെതിരെ രണ്ടു പേര്‍ ദല്‍ഹി ഹൈക്കോടതിയില്‍ നല്‍കിയ ഹര്‍ജിയില്‍ കേന്ദ്രം നല്‍കിയ സത്യാവങ്മൂലത്തിലാണ് ഇക്കാര്യം അറിയിച്ചത്.
പൗരന്റെ മൗലികാവകാങ്ങള്‍ സമൂഹ മാധ്യമങ്ങള്‍ മാനിക്കണം. മുന്‍കൂര്‍ നോട്ടീസ് നല്‍കാതെ ഏകപക്ഷീയമായി അക്കൗണ്ടുകള്‍ സസ്പെന്ഡ് ചെയ്യാന്‍ സമൂഹമാധ്യമങ്ങള്‍ക്ക് അധികാരമില്ല. അക്കൗണ്ട് സസ്പെന്ഡ് ചെയ്യുക എന്നത് അവസാനത്തെ നടപടി ആയിരിക്കണം. നിയമ വിരുദ്ധമായ ഉള്ളടക്കങ്ങളുള്ള പോസ്റ്റുകള്‍ നീക്കാന്‍ സമൂഹ മാധ്യമങ്ങള്‍ക്ക് അധികാരം ഉണ്ട്.
രാജ്യത്തിന്റെ പരമാധികാരം, സുരക്ഷ, അഖണ്ഡത, പൊതുക്രമം, വിദേശ രാജ്യങ്ങളുമായുള്ള സുഹൃദ് ബന്ധങ്ങളെ ബാധിക്കുന്ന തരത്തിലുള്ള ഇടപെടല്‍, ലൈംഗീക പീഡനമുള്‍പ്പടെ നിരോധിത ഉള്ളടക്കങ്ങള്‍ എന്നിവയെ ബാധിക്കുന്ന പോസ്റ്റുകള്‍ ഇടുന്ന അക്കൗണ്ടുകള്‍ സസ്പെന്ഡ് ചെയ്യാന്‍ സാമൂഹിക മാധ്യമങ്ങള്‍ക്ക് അധികാരമുണ്ട്.
ഒരു വ്യക്തി അദ്ദേഹത്തിന്റെ അക്കൗണ്ടില്‍ നിന്ന് നിരന്തരം ഇത്തരത്തിലുള്ള നിയമവിരുദ്ധമായ പോസ്റ്റുകളാണ് ഇടുന്നതെങ്കില്‍ ആ അക്കൗണ്ട് സസ്പെന്ഡ് ചെയ്യാം. എന്നാല്‍ മുന്‍കൂര്‍ നോട്ടീസ് നല്‍കിയ ശേഷമാകണം നടപടി സ്വീകരിക്കാനെന്നും കേന്ദ്രസര്‍ക്കാര്‍ അറിയിച്ചു. ഭരണഘടനയുടെ 14, 19, 21 അനുച്ഛേദങ്ങള്‍ മുന്നോട്ട് വയ്‌ക്കുന്ന മൗലിക അവകാശങ്ങള്‍ ഉറപ്പ് വരുത്താന്‍ തങ്ങള്‍ക്ക് ഭരണഘടനപരമായ ബാധ്യതയുണ്ട്.
സാമൂഹികവും സാങ്കേതികവുമായ പുരോഗതി കാരണം പൗരന്റെ അഭിപ്രായ സ്വാതന്ത്ര്യം ഹനിക്കാനോ ഉപേക്ഷിക്കാനോ കഴിയില്ല. ഏകപക്ഷീയമായി അക്കൗണ്ടുകള്‍ സസ്പെന്ഡ് ചെയ്യുന്നത് അഭിപ്രായ സ്വാതന്ത്ര്യം തടസ്സപ്പെടുത്തുന്നതിന് തുല്യമാണെന്നും കേന്ദ്രസര്‍ക്കാര്‍ അറിയിച്ചു.
പ്രതികരിക്കാൻ ഇവിടെ എഴുതുക: