എറവ് ക്ഷേത്ര ഭൂമിയിലെ പഞ്ചായത്തിന്റെ അനധികൃത നിർമ്മാണം തടഞ്ഞു, പ്രശ്നങ്ങൾ സൃഷ്ടിച്ചാൽ എന്തു വില കൊടുത്തും തടയുമെന്ന് ഭക്തർ

കാഞ്ഞാണി ( തൃശൂർ ): എറവ് ശ്രീ മഹാവിഷ്ണു ക്ഷേത്രത്തിന്റെ ഭൂമിയിൽ അരിമ്പൂർ പഞ്ചായത്തിന്റെ അനധികൃത നിർമാണപ്രവർത്തനങ്ങൾ ക്ഷേത്ര കമ്മറ്റിയും ഭക്തജനങ്ങളും ചേർന്ന് തടഞ്ഞു. ക്ഷേത്ര ഭൂമിയിൽ പ്രവർത്തിക്കുന്ന സർക്കാർ മൃഗാശുപത്രിക്കു മുൻപിലായിരുന്നു അരിമ്പൂർ പഞ്ചായത്ത് അധികൃതരുടെ നിർദേശപ്രകാരം നിർമ്മാണ പ്രവർത്തനങ്ങൾ നടത്താൻ ആളുകളെത്തിയത്.  

മൃഗാശുപത്രി ഇരിക്കുന്ന ഭൂമിയെ ചൊല്ലി ഹൈക്കോടതിയിലും സിവിൽ കോടതിയിലും കേസ് നടക്കുന്നതിനിടെ വിധി വരും മുമ്പെയാണ് പഞ്ചായത്തിന്റെ പ്രകാപനപരമായ നീക്കങ്ങൾ ഉണ്ടായത്. ഇന്നലെ ഉച്ചയോടെ നിർമ്മാണ പ്രവർത്തനത്തിനെത്തിയവരെ ഭക്തജനങ്ങൾ ചേർന്ന് തടയുകയായിരുന്നു. തുടർന്ന് അന്തിക്കാട് പോലീസ് സ്ഥലത്തെത്തിയാണ് രംഗം ശാന്തമാക്കിയത്.  

കോടതി വിധി വരുന്നതിനിടയിൽ പഞ്ചായത്ത് വീണ്ടും പ്രശ്നങ്ങൾ സൃഷ്ടിച്ചാൽ എന്തു വില കൊടുത്തും തടയുമെന്നും ഭക്ത ജനങ്ങൾ പറഞ്ഞു.