ന്യൂദല്‍ഹി: പരീക്ഷകള്‍ ചൂണ്ടിക്കാട്ടി ഹിജാബ് കേസില്‍ അടിയന്തര അപ്പീല്‍ നല്‍കണമെന്ന കര്‍ണാടകയിലെ ഒരു കൂട്ടം മുസ്ലീം പെണ്‍കുട്ടികള്‍ നല്‍കിയ ഹര്‍ജി സുപ്രീം കോടതി ഇന്നു വീണ്ടും തള്ളി.കേസിന്റെ നേരത്തെയുള്ള വാദം കേള്‍ക്കണമെന്നും പരീക്ഷകള്‍ അടുക്കുകയാണെന്നും വിദ്യാര്‍ത്ഥികള്‍ അവരുടെ ഹര്‍ജിയില്‍ ചൂണ്ടിക്കാട്ടിയിരുന്നു. വിഷയം വിവാദമാക്കരുതെന്ന് ഹര്‍ജിക്കാരോട് ആവശ്യപ്പെട്ട കോടതി ഹിജാബുമായി കേസിന് ബന്ധമില്ലെന്നും പറഞ്ഞു.
വാദം കേള്‍ക്കുന്നതിനുള്ള തീയതി വ്യക്തമാക്കാനും കോടതി വിസമ്മതിച്ചു. കോടതിയുടെ ഇടപെടല്‍ ഉണ്ടായില്ലെങ്കില്‍ തങ്ങള്‍ക്ക് ഒരു വര്‍ഷം നഷ്ടമാകുമെന്ന് ഹര്‍ജിക്കാര്‍ കോടതിയില്‍ വാദിച്ചു. മാര്‍ച്ച് 15 ന്, കര്‍ണാടക ഹൈക്കോടതിയുടെ മൂന്നംഗ ബെഞ്ച് ഹിജാബ് ഇസ്ലാമിക ആചാരത്തിന്റെ അവിഭാജ്യ ഘടകമല്ലെന്ന് വ്യക്തമാക്കിയിരുന്നു.
കോളേജുകളില്‍ ഹിജാബ് ധരിക്കാന്‍ അനുവദിക്കണമെന്ന് ആവശ്യപ്പെട്ട് മുസ്ലീം പെണ്‍കുട്ടികള്‍ സമര്‍പ്പിച്ച റിട്ട് ഹര്‍ജികള്‍ തള്ളിയ കോടതി, യൂണിഫോം ന്യായമായ നിയന്ത്രണമാണെന്നും വിദ്യാര്‍ത്ഥികള്‍ക്ക് അതിനെ എതിര്‍ക്കാന്‍ കഴിയില്ലെന്നും വ്യക്തമാക്കിയിരുന്നു. കേസില്‍ 11 ദിവസത്തെ വാദം കേട്ടതിന് ശേഷമാണ് ഹിജാബ് സംബന്ധിച്ച ഹൈക്കോടതി വിധി വന്നത്. ഫെബ്രുവരി 25ന് ഹൈക്കോടതി വിധി പറയാനായി മാറ്റി വച്ചിരുന്നു. നേരത്തെ, ഹൈക്കോടതിയില്‍ നിലനില്‍ക്കുന്ന ഹര്‍ജി തീര്‍പ്പാക്കുന്നതുവരെ എല്ലാ വിദ്യാര്‍ത്ഥികളും മതചിഹ്നങ്ങള്‍ ധരിക്കുന്നത് വിലക്കിയ കര്‍ണാടക ഹൈക്കോടതിയുടെ ഫെബ്രുവരി 10 ലെ ഇടക്കാല ഉത്തരവിനെ പെണ്‍കുട്ടികള്‍ സുപ്രീം കോടതിയില്‍ ചോദ്യം ചെയ്തിരുന്നു.
ജനുവരി ഒന്നിന് ഉഡുപ്പിയിലെ സര്‍ക്കാര്‍ പ്രീയൂണിവേഴ്‌സിറ്റി കോളേജിലെ അധികാരികള്‍ ഹിജാബ് ധരിക്കുന്നതില്‍ നിന്ന് ആറ് മുസ്ലീം പെണ്‍കുട്ടികളെ കോളേജ് യൂണിഫോം അടിസ്ഥാനത്തില്‍ വിലക്കിയതോടെയാണ് ഹിജാബ് വിവാദം പൊട്ടിപ്പുറപ്പെട്ടത്. വിവാദം പിന്നീട് കര്‍ണാടകയിലെ മറ്റ് കോളേജുകളിലേക്കും വ്യാപിക്കുകയായിരുന്നു.
പ്രതികരിക്കാൻ ഇവിടെ എഴുതുക: