ഇടുക്കി: സംസ്ഥാനത്ത് സീസണിലെ ഏറ്റവും കൂടിയ താപനില ഇന്നലെ പുനലൂരില്‍ രേഖപ്പെടുത്തി, 39.2 ഡിഗ്രി. കഴിഞ്ഞ ദിവസം ഇത് 38.8 ഡിഗ്രിയായിരുന്നു.
വെള്ളാനിക്കര-38.5, കോട്ടയം- 37.5, പാലക്കാട്- 37.4, കോട്ടയം-37.3, കണ്ണൂര്‍- 36.8, ആലപ്പുഴ- 36.2, തിരുവനന്തപുരം- 36.1, കോഴിക്കോട്- 35.8, കൊച്ചി- 33.6 എന്നിങ്ങനെയാണ് ഇന്നലെ രേഖപ്പെടുത്തിയ കൂടിയ താപനില. സംസ്ഥാനത്ത് വേനല്‍ ചൂട് ക്രമാതീതമായി വര്‍ദ്ധിച്ചു വരുന്ന സാഹചര്യത്തില്‍ സൂര്യാഘാതമേല്‍ക്കാനും സൂര്യാതപത്തിനും സാധ്യതയുണ്ടെന്നും ജനങ്ങള്‍ ജാഗ്രത തുടരണമെന്നും സംസ്ഥാന ദുരന്തനിവാരണ സമിതിയും അറിയിച്ചു.
സൂര്യന്‍ ഉത്തരായന രേഖയിലേക്ക് എത്തുന്നതിനാല്‍ വരും ദിവസങ്ങളില്‍ കനത്ത ചൂട് തുടരുമെന്ന് കാലാവസ്ഥ ഗവേഷകനായ ഡോ. ഗോപകുമാര്‍ ചോലയിലും പറഞ്ഞു. ശക്തമായ മഴ ലഭിച്ചെങ്കില്‍ മാത്രമേ താപനിലയില്‍ കാര്യമായ കുറവുണ്ടാകൂ എന്നും അദ്ദേഹം പറഞ്ഞു. കഴിഞ്ഞ വര്‍ഷം ഇടവിട്ട് വേനല്‍ മഴ എത്തിയതിനാല്‍ താപനില ഉയര്‍ന്നെങ്കിലും അത് അസഹനീയമായിരുന്നില്ല. ബംഗാള്‍ ഉള്‍ക്കടലില്‍ ന്യൂനമര്‍ദത്തിന് നിലവില്‍ സാധ്യത കാണുന്നുണ്ടെങ്കിലും ഇത് കേരളത്തില്‍ മഴക്ക് കാരണമാകില്ലെന്നാണ് വിലയിരുത്തല്‍.
അതേ സമയം ഇന്ന് താപനിലയില്‍ നേരിയ കുറവുണ്ടാകുമെന്നാണ് കേന്ദ്ര കാലാവസ്ഥ നിരീക്ഷണം കേന്ദ്രം അറിയിക്കുന്നത്. ഉച്ചയ്‌ക്ക് ശേഷം ചിലയിടങ്ങളില്‍ മഴയ്‌ക്കും സാധ്യതയുണ്ട്. കഴിഞ്ഞ ദിവസങ്ങളില്‍ ഉണ്ടായിരുന്ന താപനില മുന്നറിയിപ്പ് പിന്‍വലിച്ചിട്ടുണ്ട്.
പ്രതികരിക്കാൻ ഇവിടെ എഴുതുക