ന്യൂദല്‍ഹി : റഷ്യ- ഉക്രൈന്‍ സംഘര്‍ഷങ്ങളെ തുടര്‍ന്ന് ഉക്രൈനില്‍ കുടുങ്ങിയ 1377 ഇന്ത്യക്കാരെ രക്ഷപ്പെടുത്തിയതായി കേന്ദ്ര വിദേശകാര്യമന്ത്രി എസ്. ജയശങ്കര്‍. ഓപ്പറേഷന്‍ ഗംഗ എന്നാണ് രക്ഷാ ദൗത്യത്തിന് ഇന്ത്യ പേര് നല്‍കിയിരിക്കുന്നത്. ഉക്രൈന്‍ തലസ്ഥാനമായ കീവിലുണ്ടായിരുന്ന എല്ലാ ഇന്ത്യക്കാരേയും ഒഴിപ്പിച്ചിട്ടുണ്ട്. ഇനി ആരും അവശേഷിക്കുന്നില്ലെന്നും കേന്ദ്രമന്ത്രി അറിയിച്ചു.
അടുത്ത മൂന്ന് ദിവസത്തില്‍ 26 വിമാനങ്ങള്‍കൂടി ഹംഗറി, പോളണ്ട്, റൊമാനിയ, സ്ലോവാക്യ എന്നീ രാജ്യങ്ങളിലേക്ക് ഇന്ത്യക്കാരെ തിരികെ കൊണ്ടു വരാനായി പോകുന്നുണ്ട്. ഇന്ത്യന്‍ വ്യോമസേനയും രക്ഷാദൗത്യത്തില്‍ ഭാഗമാകും. ഇതിനായി വ്യോമസേനയുടെ ഗ്ലോബ്മാസ്റ്റര്‍ സി17 റൊമേനിയയില്‍ എത്തിയിട്ടുണ്ട്. 31 വിമാനങ്ങളിലായി 6300 ഓളം പേരാണ് തിരിച്ചുവരാനുള്ളത്.
65 കിലോ മീറ്റര്‍ നീളം വരുന്ന വമ്പന്‍ റഷ്യന്‍ സൈനിക വ്യൂഹം കീവ് ലക്ഷ്യമാക്കി യാത്ര ആരംഭിച്ചതോടെ ഇന്ത്യന്‍ എംബസ്സി കീവിലുള്ള ഇന്ത്യാക്കാരോട് എത്രയും വേഗം അവിടം വിടാനും സുരക്ഷിത കേന്ദ്രങ്ങളിലേക്ക് പോകാനും ആവശ്യപ്പെടുകയായിരുന്നു. ഉക്രൈന്‍ മെട്രോ സൗജന്യമാക്കി ഇത് ഉപയോഗപ്പെടുത്തി സുരക്ഷിത കേന്ദ്രങ്ങളിലേക്ക് വിദ്യാര്‍ത്ഥികളെ എത്തിച്ച് അവിടെ നിന്നും വിമാനസര്‍വീസുകള്‍ ലഭ്യമാകുന്ന പക്ഷം ഇന്ത്യയിലേക്ക് തിരിച്ചയയ്‌ക്കുകയാണ്. ഇതിനായി അതിര്‍ത്തികളില്‍ കൂടുതല്‍ ഉദ്യോഗസ്ഥരെ ഇന്ത്യന്‍ എംബസ്സി നിയോഗിച്ചിട്ടുണ്ട്.
അതേസമയം പോളണ്ടില്‍ നിന്നുള്ള ആദ്യവിമാനം ഇന്ന് രാവിലെ തിരിച്ചെത്തി. പോളണ്ടില്‍ നിന്ന് മൂന്ന് വിമാനങ്ങളിലായി 600 നടുത്ത് ഇന്ത്യക്കാര്‍ ഇന്ന് തിരിക്കും. ഹംഗറിയിലേക്കും റോമേനിയയിലേക്കും ഓരോ വ്യോമസേന വിമാനങ്ങള്‍ പുറപ്പെട്ടു.
ഇന്ന് രാവിലെ മുതല്‍ മൂന്ന് വിമാനങ്ങളാണ് ഉക്രൈനില്‍ നിന്നെത്തിയത്. എഴുന്നൂറില്‍ അധികം പേര് ഇതില്‍ തിരിച്ചെത്തി. കേന്ദ്രമന്ത്രിമാരായ സ്മൃതി ഇറാനി, ജിതേന്ദര്‍ സിംഗ്, രാജിവ് ചന്ദ്രശേഖര്‍ എന്നിവരെത്തിയാണ് വിദ്യാര്‍ത്ഥികളെ സ്വീകരിച്ചത്.
പ്രതികരിക്കാൻ ഇവിടെ എഴുതുക: