കറാച്ചി: പാകിസ്ഥാന്‍ സൂപ്പര്‍ ലീഗില്‍ (പിഎസ്എല്‍) തിങ്കളാഴ്ച പെഷവാര്‍ സാല്‍മിക്കെതിരായ സുപ്രധാന മത്സരത്തിനിടെ ക്യാച്ച് കൈവിട്ടതിന് ലാഹോര്‍ ഖലന്‍ഡേഴ്‌സ് പേസര്‍ ഹാരിസ് റൗഫ് തന്റെ സഹതാരം കമ്രാന്‍ ഗുലാമിനെ കരണത്തടിച്ചു. കരണത്തടിക്കുന്ന വീഡിയോ പുറത്തുവന്നതോടെ റൗഫിനെതിരേ വിമര്‍ശനം ശക്തമാവുകയാണ്.
ഇന്നിംഗ്‌സിന്റെ രണ്ടാം ഓവറില്‍ പെഷവാര്‍ സാല്‍മിയുടെ മുഹമ്മദ് ഹാരിസിനെ ലാഹോറിന്റെ റൗഫ് പുറത്താക്കുകയും വിക്കറ്റ് ആഘോഷിക്കുന്നതിനിടെ പാകിസ്ഥാന്‍ പേസറായ കമ്രാന്‍ ഗുലാമിന്റെ കവളിത്ത് ആഞ്ഞടിക്കുകയുമായിരുന്നു. നേരത്തെ, അതേ ഓവറില്‍ റൗഫിന്റെ ബൗളിങ്ങില്‍ ഹസ്രത്തുള്ള സസായിയുടെ ക്യാച്ച് ഗുലാം കൈവിട്ടിരുന്നു. ഈ ദേഷ്യത്തിലാണ് ഗുലാമിനെ റൗഫ് കരണത്തടിച്ചത്.
അടിയേറ്റതിനു ശേഷവും ഗുലാം റൗഫിനെ സൗഹൃദത്തോടെ പിടിക്കുന്നതും പുഞ്ചിരിക്കുന്നതും കാണാമായിരുന്നു. പക്ഷേ റൗഫിന്റെ ഭാവങ്ങള്‍ സൗഹൃദപരമായിരുന്നില്ല. ഹാരിസിന്റെ ക്രൂരമായ പെരുമാറ്റം ആരാധകരുടെ വിമര്‍ശനത്തിനിടയാക്കി. തിങ്കളാഴ്ച നടന്ന ഈ പാകിസ്ഥാന്‍ സൂപ്പര്‍ ലീഗിലെ ആദ്യ സൂപ്പര്‍ ഓവറില്‍ പെഷവാര്‍ സാല്‍മി ലാഹോര്‍ ഖലാന്‍ഡേഴ്‌സിനെ പരാജയപ്പെടുത്തി.
പ്രതികരിക്കാൻ ഇവിടെ എഴുതുക: