ന്യൂദല്ഹി: കോവിഡ് പ്രതിസന്ധിക്ക് അയവു വന്ന ശേഷം രാജ്യത്ത് പൗരത്വ ഭേദഗതി നിയമം നടപ്പാക്കുക തന്നെ ചെയ്യുമെന്നും കേന്ദ്ര ആഭ്യന്തരമന്ത്രി അമിത് ഷാ. പൗരത്വ ഭേദഗതി നിയമം നടപ്പാക്കുന്നത് കോവിഡ് സാഹചര്യവുമായി ബന്ധപ്പെട്ടിരിക്കുകയാണെന്നും അദ്ദേഹം ദേശീയ ചാനലിന് അനുവദിച്ച അഭിമുഖത്തില് വ്യക്തമാക്കി. നിയമത്തില് നിന്ന് പിന്നാക്കം പോകുന്ന ചോദ്യം ഉദിക്കുന്നതേയില്ലെന്നും അമിത് ഷാ.
പാകിസ്ഥാന്, ബംഗ്ലാദേശ്, അഫ്ഗാനിസ്ഥാന് എന്നിവിടങ്ങളിലെ പീഡിപ്പിക്കപ്പെടുന്ന അമുസ്ലിം ന്യൂനപക്ഷങ്ങള്ക്ക് ഇന്ത്യന് പൗരത്വം നല്കാന് സഹായിക്കുന്ന നിയമഭേദഗതിയായ സിഎഎ 2019 ഡിസംബര് 11 ന് പാര്ലമെന്റ് പാസാക്കുകയും അടുത്ത ദിവസം രാഷ്ട്രപതിയുടെ അനുമതി ലഭിക്കുകയും ചെയ്തു. എന്നാലും, സിഎഎയ്ക്ക് കീഴിലുള്ള ഉപ നിയമങ്ങള് ഇനിയും രൂപീകരിക്കാത്തതിനാല് നിയമം ഇതുവരെ നടപ്പാക്കിയിട്ടില്ല.
സിഎഎ എപ്പോള് നടപ്പാക്കുമെന്ന ചോദ്യത്തിന് നമ്മള് കോവിഡ് 19 ല് നിന്ന് മോചിതരാകാത്തിടത്തോളം കാലം ഇതിന് മുന്ഗണന നല്കാനാവില്ല. രാജ്യം രോഗത്തിന്റെ മൂന്ന് തരംഗങ്ങള് കണ്ടു. ഇപ്പോള് കാര്യങ്ങള് മെച്ചപ്പെടുന്നു, മൂന്നാമത്തെ തരംഗം പിന്വാങ്ങുകയാണ്. കോവിഡ് സാഹചര്യവുമായി ബന്ധപ്പെട്ടാണ് തീരുമാനം. എന്നാല് നിയമത്തില് നിന്ന് പിന്നോട്ട് പോകുന്ന പ്രശ്നമില്ലെന്നും അമിത് ഷാ.
ഈ വര്ഷം ജനുവരിയില്, സിഎഎ പ്രകാരം നിയമങ്ങള് രൂപീകരിക്കുന്നതിന് കൂടുതല് സമയം ആവശ്യപ്പെട്ട് കേന്ദ്ര ആഭ്യന്തര മന്ത്രാലയം പാര്ലമെന്ററി കമ്മിറ്റികളെ സമീപിച്ചിരുന്നു.പാര്ലമെന്ററി പ്രവര്ത്തനത്തെക്കുറിച്ചുള്ള മാനുവല് അനുസരിച്ച്, രാഷ്ട്രപതിയുടെ അംഗീകാരം ലഭിച്ച് ആറ് മാസത്തിനുള്ളില് ഏതെങ്കിലും നിയമനിര്മ്മാണത്തിനുള്ള നിയമങ്ങള് രൂപീകരിക്കണം അല്ലെങ്കില് ക ലോക്സഭ, രാജ്യസഭ എന്നിവയുടെ സമിതികളില് നിന്ന് വിപുലീകരണം തേടണം. സിഎഎ പ്രാബല്യത്തില് വന്ന് ആറു മാസത്തിനുള്ളില് നിയമങ്ങള് രൂപീകരിക്കാന് ആഭ്യന്തര മന്ത്രാലയത്തിന് കഴിയാത്തതിനാല് അതാതു കമ്മിറ്റികളില് നിന്ന് സമയം തേടിയിരുന്നു. ആദ്യം 2020 ജൂണിലും പിന്നീട് നാല് തവണയും.
നിയമനിര്മ്മാണത്തിന് കീഴിലുള്ള നിയമങ്ങള് വിജ്ഞാപനം ചെയ്തതിന് ശേഷം മാത്രമേ സിഎഎയുടെ അര്ഹരായ ഗുണഭോക്താക്കള്ക്ക് ഇന്ത്യന് പൗരത്വം നല്കൂ എന്ന് കേന്ദ്ര സര്ക്കാര് ഇതിനകം വ്യക്തമാക്കിയിട്ടുണ്ട്. പാകിസ്ഥാന്, ബംഗ്ലാദേശ്, അഫ്ഗാനിസ്ഥാന് എന്നിവിടങ്ങളില് നിന്ന് പീഡിപ്പിക്കപ്പെടുന്ന ഹിന്ദുക്കള്, സിഖുകാര്, ജൈനര്, ബുദ്ധമതക്കാര്, പാഴ്സികള്, ക്രിസ്ത്യാനികള് തുടങ്ങിയ ന്യൂനപക്ഷങ്ങള്ക്ക് ഇന്ത്യന് പൗരത്വം നല്കുക എന്നതാണ് സിഎഎയുടെ ലക്ഷ്യം.
