തിരുവനന്തുപുരം : കൗണ്‍സലിങ്ങിനെത്തിയ 13 കാരനെ പീഡിപ്പിച്ച കേസില്‍ മനോരോഗ വിദഗ്ദന്‍ ഡോ. ഗിരീഷിനെ കുറ്റക്കാരനെന്ന് കോടതി. തിരുവനന്തപുരം അതിവേഗ സ്‌പെഷ്യല്‍ കോടതി ജഡ്ജി ആര്‍. ജയകൃഷ്ണനാണ് കേസില്‍ ഗിരീഷിനെ കുറ്റക്കാരനെന്ന് വിധിച്ചത്.
2017 ഓഗസ്റ്റ് 14നാണ് കേസിനസ്പദമായ സംഭവം. പഠനത്തില്‍ ശ്രദ്ധ കുറവുണ്ടെന്ന് സ്‌കൂള്‍ അധികൃതര്‍ പറഞ്ഞതിനെ തുടര്‍ന്നാണ് കുട്ടിയുമായി മാതാപിതാക്കള്‍ പ്രതിയായ മനോരോഗ വിദഗ്ധന്റെയടുത്ത് എത്തിയത്. അന്ന് പ്രതി സര്‍ക്കാര്‍ മെന്റല്‍ ഹെല്‍ത്ത് സെന്ററിലെ ഡോക്ടറായിരുന്നു.
ചികിത്സയ്‌ക്കായി കുട്ടി എത്തുമ്പോഴെല്ലാം ഇയാള്‍ പീഡിപ്പിച്ചിരുന്നു. കുട്ടിയോട് സംസാരിക്കുന്നതിനിടെ കുട്ടിയെ പല തവണ ഉമ്മ വെയ്‌ക്കുകയും സ്വകാര്യ ഭാഗത്ത് സ്പര്‍ശിക്കുകയും ചെയ്തിരുന്നു. കൂടാതെ ആരോടും പറയരുതെന്നും ഭീഷണിപ്പെടുത്തി. കൗണ്‍സിലിങ്ങിന് ശേഷവും മകന്‍ ആരോടും മിണ്ടാതിരിക്കുകയും ഭയം പ്രകടിപ്പിക്കുകയും ചെയ്ത് മാതാപിതാക്കള്‍ ചോദ്യം ചെയ്തപ്പോഴാണ് പീഡനവിവരം പുറത്തറിയുന്നത്.
ഇതോടെ കുട്ടിയുടെ മാതാപിതാക്കള്‍ ചൈല്‍ഡ്ലൈനില്‍ അറിയിക്കുകയായിരുന്നു. രക്ഷിതാക്കളുടെ പരാതിയില്‍ ഫോര്‍ട്ട് പോലീസ് പ്രതികള്‍ക്ക് കേസുമെടുത്തു. മറ്റൊരു കുട്ടിയെ പീഡിപ്പിച്ച കേസിലും ഗിരീഷ് പ്രതിയാണ്. കേസില്‍ വിചാരണ ഇനിയും പൂര്‍ത്തിയായിട്ടില്ല. ചികിത്സയ്‌ക്ക് എത്തിയ വിവാഹിതയെ പീഡിപ്പിക്കാന്‍ ശ്രമിച്ച സംഭവത്തിലും ഇയാള്‍ പ്രതിയായിരുന്നു. എന്നാല്‍ ഇത് ഒത്തുതീര്‍പ്പാക്കി.
പ്രതികരിക്കാൻ ഇവിടെ എഴുതുക: