മുംബൈ: ഐപിഎല്‍ 2022 താരലേലത്തിനുള്ള (IPL Auction 2022) അന്തിമ പട്ടിക പുറത്തുവിട്ട് ബിസിസിഐ. 590 താരങ്ങളുടെ പട്ടികയാണ് ബിസിസിഐ (BCCI) പ്രസിദ്ധീകരിച്ചത്. മലയാളി താരം എസ് ശ്രീശാന്ത് (S Sreesanth) പട്ടികയില്‍ ഇടംപിടിച്ചു. ബെംഗളൂരുവില്‍ ഫെബ്രുവരി 12, 13 തിയതികളിലാണ് താരലേലം. ശിഖര്‍ ധവാന്‍, മുഹമ്മദ് ഷമി, ഫാഫ് ഡുപ്ലസിസ്, ഡേവിഡ് വാര്‍ണര്‍, പാറ്റ് കമ്മിന്‍സ്, ശ്രേയസ് അയ്യര്‍, ആര്‍ അശ്വിന്‍, ക്വിന്റണ്‍ ഡികോക്ക്, കാഗിസോ റബാഡ, ട്രെന്‍ഡ് ബോള്‍ട്ട് എന്നിവരാണ് മാര്‍ക്വീ താരങ്ങള്‍.
590 ക്രിക്കറ്റ് താരങ്ങളില്‍ 228 പേര്‍ ക്യാപ്ഡ് കളിക്കാരും 355 പേര്‍ അണ്‍ക്യാപ്ഡ് താരങ്ങളുമാണ്. ഐസിസിയുടെ അസോസിയേറ്റ് രാജ്യങ്ങളില്‍ നിന്ന് ഏഴ് താരങ്ങളും അന്തിമ പട്ടികയില്‍ എത്തി. ആകെ താരങ്ങളില്‍ 370 പേരാണ് ഇന്ത്യയില്‍ നിന്നുള്ളത്. 220 താരങ്ങള്‍ വിദേശികള്‍. ഏറ്റവും ഉയര്‍ന്ന അടിസ്ഥാന വിലയായ രണ്ട് കോടിയില്‍ 48 താരങ്ങളുണ്ട്. 1.5 കോടി അടിസ്ഥാന വില 20 താരങ്ങളും ഒരു കോടി 34 താരങ്ങളും തെരഞ്ഞെടുത്തു. ഇഷാന്‍ കിഷന്‍, യുസ്വേന്ദ്ര ചാഹല്‍, വാഷിംഗ്ടണ്‍ സുന്ദര്‍, ഷര്‍ദ്ദുല്‍ ഠാക്കൂര്‍, ദീപക് ചഹാര്‍ എന്നീ ഇന്ത്യന്‍ താരങ്ങള്‍ക്കായി വാശിയേറിയ ലേലം നടന്നേക്കും.
പഞ്ചാബിന് 23 താരങ്ങളും, രാജസ്ഥാന്‍, ബാംഗ്ലൂരു, ഹൈദരാബാദ്, അഹമ്മദാബാദ്, ലക്നോവിനും 22 വീതം താരങ്ങളെ തിരഞ്ഞടുക്കാം. ചെന്നൈ, ദല്‍ഹി, കൊല്‍ക്കത്ത, മുംബൈക്കും 21 വീതം താരങ്ങളേയാണ് ലേലത്തില്‍ സ്വന്തമാക്കാനാവുക. പഞ്ചാബിന് എട്ടും കൊല്‍ക്കത്തയ്‌ക്ക് ആറും മറ്റു ഫ്രാഞ്ചൈസികള്‍ക്ക് ഏഴ് വീതവും വിദേശ താരങ്ങളെ സ്വന്തമാക്കാം.
ലേലത്തിന് ടീമുകള്‍ ചിലവാക്കുന്ന തുക
ചെന്നൈ സൂപ്പര്‍ കിംഗ്സ്(48 കോടി), ഡല്‍ഹി ക്യാപിറ്റല്‍സ്(47.5 കോടി), കൊല്‍ക്കത്ത നൈറ്റ് റൈഡേഴ്സ്(48 കോടി), ലക്നോ സൂപ്പര്‍ ജയന്റ്സ്(59 കോടി) മുംബൈ ഇന്ത്യന്‍സ്(48 കോടി), പഞ്ചാബ് കിംഗ്സ്(72 കോടി), രാജസ്ഥാന്‍ റോയല്‍സ്(62 കോടി), റോയല്‍ ചലഞ്ചേഴ്സ്(57 കോടി), സണ്‍റൈസേഴ്സ് ഹൈദരാബാദ്(68 കോടി), ടീം അഹമ്മദാബാദ്(52 കോടി).
പ്രതികരിക്കാൻ ഇവിടെ എഴുതുക: