അരുണാചല്‍പ്രദേശില്‍ നിന്നും ചൈനീസ് സേന തട്ടിക്കൊണ്ടുപോയതായി സംശയിച്ച ആണ്‍കുട്ടിയെ കണ്ടെത്തി; ഇന്ത്യന്‍ സേനയുടെ നയതന്ത്ര വിജയം

ന്യൂദല്‍ഹി: അരുണാചല്‍പ്രദേശില്‍ നിന്നും ചൈനീസ് സേന തട്ടിക്കൊണ്ടുപോയതായി സംശയിച്ചിരുന്ന  ആണ്‍കുട്ടിയെ കണ്ടെത്തയതായി ഇന്ത്യന്‍ പ്രതിരോധമന്ത്രാലയം അറിയിച്ചു. 17കാരനായ മിറാം ടറോം എന്ന കൗമാരപ്രായക്കാരനെ അരുണാചലില്‍ നിന്നും ചൈനയുടെ പീപ്പിള്‍സ് ലിബറേഷന്‍ ആര്‍മി  പിടിച്ചുകൊണ്ടുപോയതായി വാര്‍ത്തപരന്നതോടെ ഇന്ത്യന്‍ പ്രതിരോധ സേനയിലും ആശങ്ക പരന്നിരുന്നു.  എന്നാല്‍ കുട്ടിയെ കണ്ടെത്തിയതായി ചൈനീസ് സേന തന്നെ അറിയിച്ചതോടെ ഇന്ത്യയും ചൈനയും തമ്മില്‍ വലിയൊരു നയതന്ത്ര ഏറ്റുമുട്ടലിലേക്ക് നീങ്ങുമായിരുന്ന പ്രശ്നത്തിന് അറുതിയായി.  

‘നേരത്തെ അരുണാചല്‍പ്രദേശിലെ സിഡോ സ്വദേശിയായ 17 കാരനായ മിറാം ടറോമിനെ ചൈനയുടെ പീപ്പിള്‍സ് ലിബറേഷന്‍ ആര്‍മി (പിഎല്‍എ) യഥാര്‍ത്ഥ നിയന്ത്രണരേഖയ്‌ക്കടുത്തുള്ള ഇന്ത്യയുടെ ഭാഗത്ത് നിന്നും പിടിച്ചുകൊണ്ടുപോയതായി റിപ്പോര്‍ട്ടുണ്ടായിരുന്നു. ഇതോടെ ഇന്ത്യന്‍ സേന പീപ്പിള്‍സ് ലിബറേഷന്‍ ആര്‍മി(പിഎല്‍എ) യുമായി ഹോട്ട്‌ലൈന്‍ വഴി ബന്ധപ്പെട്ടു. പിപ്പീള്‍സ് ലിബറേഷന്‍ ആര്‍മിയോട് കുട്ടിയെ കണ്ടെത്താന്‍ ആവശ്യപ്പെട്ടു, അവര്‍ പ്രൊട്ടോക്കോള്‍ അനുസരിച്ച് കുട്ടിയെ കൈമാറി,’- ഹര്‍ഷ് വര്‍ധന്‍ പാണ്ഡേ പറഞ്ഞു.

നേരത്തെ അരുണാചല്‍പ്രദേശ് ഈസ്റ്റ് എംപി ടാപില്‍ ഗാവോ 17കാരനെ ഇന്ത്യന്‍ പ്രദേശത്ത് നിന്നും ചൈനീസ് സേന തട്ടിക്കൊണ്ടുപോയതായി ആരോപിച്ചതോടെ അന്തരീക്ഷം കലുഷിതമായി.  അരുണാചല്‍പ്രദേശിലെ അപ്പര്‍ സിയാങ് ജില്ലിയില്‍ നിന്നും കുട്ടിയെ തട്ടിക്കൊണ്ടുപോയതായും എംപി ആരോപിച്ചിരുന്നു. സാംഗ്‌പോ നദി ഇന്ത്യയിലെ അരുണാചല്‍പ്രദേശിലേക്ക് കടക്കുന്ന സ്ഥലത്ത് നിന്നാണ് കുട്ടിയെ ചൈനയുടെ പീപ്പിള്‍സ് ലിബറേഷന്‍ ആര്‍മി തട്ടിക്കൊണ്ടുപോയതെന്നും അദ്ദേഹം ആരോപിച്ചിരുന്നു. ഇക്കാര്യം സൂചിപ്പിച്ച് ടാപില്‍ ഗാവോ ട്വീറ്റ് ചെയ്തപ്പോള്‍ പ്രധാനമന്ത്രി നരേന്ദ്രമോദി, ആഭ്യന്തരമന്ത്രി അമിത് ഷാ, പ്രതിരോധ മന്ത്രി രാജ്‌നാഥ് സിങ്ങ്, ഇന്ത്യന്‍ സേന എന്നിവരെ ടാഗ് ചെയ്തിരുന്നു. പിന്നീട് മിറാം ടറോം എന്ന 17 കാരന്‍ അപ്രത്യക്ഷമായ വിവരം അരുണാചല്‍ പ്രദേശ് മുഖ്യമന്ത്രി പേമ കണ്ഡുവും സ്ഥിരീകരിച്ചു.  

അതോടെ ഇന്ത്യന്‍ സേന യഥാര്‍ത്ഥ നിയന്ത്രണ രേഖയ്‌ക്ക് കുറുകെയുള്ള ചൈനീസ് സേനാകേന്ദ്രവുമായി നിരന്തരം ബന്ധം പുലര്‍ത്തി വരികയായിരുന്നു. ഞായറാഴ്ചയാണ് ആണ്‍കുട്ടിയെ കണ്ടുകിട്ടിയ വിവരം ചൈനീസ് സേന ഇന്ത്യന്‍ പ്രതിരോധ സേനയെ അറിയിച്ചത്. തേസ്പൂരിലെ ഇന്ത്യന്‍ പ്രതിരോധമന്ത്രാലയത്തിന്റെ പിആര്‍ഒ ആണ് ഇക്കാര്യം സ്ഥിരീകരിച്ചത്.

ജനവരി 18 മുതലാണ് മിറാം ടറോമിനെ കാണാതായത്. എന്നാല്‍ ചൈനീസ് അധികൃതര്‍ ഇത്രയും ദിവസങ്ങള്‍ ഇതേപ്പറ്റി മൗനംപാലിക്കുകയായിരുന്നു. എന്നാല്‍ ഇന്ത്യ നയതന്ത്ര തലത്തില്‍ സമ്മര്‍ദ്ദം മുറുക്കിയതോടെയാണ് നാടകീയമായി ഞായറാഴ്ച ആണ്‍കുട്ടിയെ കണ്ടെത്തിയതായി ചൈന സ്ഥിരീകരിച്ചത്.