ജൊഹന്നസ്ബര്‍ഗ്: ഇന്നു കൂടി തോറ്റാല്‍ പരമ്പര നഷ്ടമാകും. ദക്ഷിണാഫ്രിക്കന്‍ പര്യടനം തോല്‍വികളുടെ കണക്കു പറയാതിരിക്കണമെങ്കില്‍ ഇന്ന് വിജയിച്ചേ മതിയാകൂ. ഏകദിന പരമ്പരയിലെ രണ്ടാം മത്സരം ഇന്ന് ഉച്ചയ്‌ക്ക് രണ്ടിന് ആരംഭിക്കും.
മധ്യനിരയുടെ ഫോമില്ലായ്മയും ബൗളര്‍മാരുടെ മോശം പ്രകടനവുമാണ് കഴിഞ്ഞ മത്സരത്തില്‍ ഇന്ത്യക്ക് തിരിച്ചടിയായത്. ഓപ്പണര്‍ ശിഖര്‍ ധവാനും വിരാട് കോഹ്‌ലിയും ഫോമിലേക്കെത്തിയതാണ് ഏക ആശ്വാസം. നായകന്‍ കെ.എല്‍. രാഹുലിന്റെ പ്രകടനം ആശങ്കയുയര്‍ത്തുന്നു. ബൗളിങ്ങില്‍ വരുത്തിയ പല മാറ്റങ്ങളും മികച്ച ഫീല്‍ഡ് തയാറാക്കാതെ അനായാസം റണ്‍സ് നല്‍കിയതും വിനയായി. ടീമില്‍ വെങ്കിടേഷ് അയ്യരുടെ സ്ഥാനം രണ്ടാം മത്സരത്തില്‍ നഷ്ടമായേക്കും. കളിയില്‍ പന്തെറിയാതിരുന്ന അയ്യരെ ബാറ്റ്‌സ്മാന്‍ മാത്രമായാണ് കളിപ്പിച്ചത്. ബാറ്റ്‌സ്മാന്‍ മാത്രമായി അയ്യരെ എന്തിന് കളിപ്പിക്കണമെന്നതാണ് മുന്‍ താരങ്ങളടക്കം ചോദിക്കുന്നത്. സൂര്യകുമാര്‍ യാദവ് ഉള്‍പ്പെടെയുള്ളവരെ ഒഴിവാക്കി ബാറ്റ്‌സ്മാനായി അയ്യരെ കളിപ്പിച്ചത് വിമര്‍ശനത്തിന് വഴിവയ്‌ക്കും.
കളിയില്‍ ഒരിക്കല്‍ പോലും മികച്ച ബൗളിങ് മാറ്റം നടത്താനോ ദക്ഷിണാഫ്രിക്കയെ സമ്മര്‍ദത്തിലാക്കാനോ രാഹുലിന് കഴിഞ്ഞില്ല. ആദ്യമുണ്ടായ തകര്‍ച്ചയ്‌ക്ക് ശേഷം മികച്ച രീതിയില്‍ കളിച്ച ബാവുമ്മയും വാന്‍ഡര്‍ ഡൂസനും പല തവണ സ്വീപ്പുള്‍പ്പെടെയുള്ള ഷോട്ടുകള്‍ കളിച്ചപ്പോള്‍ കൃത്യമായ ഫീല്‍ഡ് തയാറാക്കാന്‍ രാഹുലിന് കഴിയാതെ പോയത് തോല്‍വിയുടെ സാധ്യത കൂട്ടി. അശ്വിനും ചാഹലും കൂടി വിട്ടുനല്‍കിയത് 20 ഓവറില്‍ നിന്ന് 106 റണ്‍സാണ്. നേടിയത് ഒരു വിക്കറ്റ്. ബാറ്റിങ്ങിലും ബൗളിങ്ങിലും മാറ്റങ്ങള്‍ വരുത്തി പരമ്പരയില്‍ ഒപ്പമെത്തുകയാണ് ഇന്ത്യയുടെ ലക്ഷ്യം.
പ്രതികരിക്കാൻ ഇവിടെ എഴുതുക: