തിരുവനന്തപുരം: ഹൈക്കോടതി നിര്ദ്ദേശത്തെ തുടര്ന്ന് കേരള പോലീസ് ചുരുളി സിനിമ കാണുന്നു. സിനിമയില് സഭ്യമല്ലാത്ത ഭാഷ ഉപയോഗിച്ചുവെന്ന തൃശൂര് സ്വദേശിനിയായ അഭിഭാഷക ഹൈക്കോടതിയില് നല്കിയ പരാതിയെ തുടര്ന്ന് പരിശോധിച്ച് റിപ്പോര്ട്ട് നല്കാന് ഹൈക്കോടതി പോലീസിനോട് നിര്ദ്ദേശിച്ചിരുന്നു. ഇതനുസരിച്ചാണ് പോലീസ് സിനിമ കാണുന്നത്.
എഡിജിപി പദ്മകുമാര്, തിരുവനന്തപുരം റൂറല് എസ്പി ദിവ്യ ഗോപിനാഥ്, തിരുവനന്തപുരം സിറ്റി അഡ്മിന് എ.സി.പി എ നസീമ എന്നിവരാണ് റിപ്പോര്ട്ട് സമര്പ്പിക്കാന് സിനിമ കാണുക. സിനിമയിലുപയോഗിച്ചിരിക്കുന്ന സഭ്യമല്ലാത്ത വാക്കുകള് പരിശോധിക്കുന്നതിനാണ് സമിതി രൂപീകരിച്ചത്. ഇവര് സിനിമ കണ്ടതിന് ശേഷം തയ്യാറാക്കുന്ന റിപ്പോര്ട്ട് ഹൈക്കോടതിക്ക് കൈമാറും. ലിജോ ജോസ് പെല്ലിശ്ശേരി സംവിധാനം ചെയ്ത ‘ചുരുളി’ ഏതെങ്കിലും തരത്തിലുള്ള നിയമ ലംഘനം നടന്നിട്ടുണ്ടോ എന്നറിയിക്കാന് ഹൈക്കോടതി കുറച്ച് ദിവസം മുന്പ് ഡിജിപിയ്ക്ക് നിര്ദേശം നല്കിയിരുന്നു. കേസില് ഡിജിപിയെ കോടതി സ്വമേധയാ കക്ഷി ചേര്ത്തിരുന്നു.
