പരവൂര്: രാത്രികാല കര്ഫ്യൂവിന്റെ മറവില് ചിറക്കരയിലും പരിസര പ്രദേശങ്ങളിലും മോഷണം വ്യാപകമായി.
കഴിഞ്ഞദിവസം ചിറക്കരത്താഴം ഷേര്ളി ഭവനില് മോഹനദാസിന്റെ വീട്ടില് നിന്നും 80 റബ്ബര്ഷീറ്റുകള് മോഷണം പോയി. സന്ധ്യ മയങ്ങിയാല് ആളൊഴിഞ്ഞ പ്രദേശങ്ങളിലും കാട് പിടിച്ചുകിടക്കുന്ന കനാല് ഭാഗങ്ങളിലും മയക്കുമരുന്ന്, മദ്യപാനി സംഘങ്ങളുടെ വിളയാട്ടമാണ്. കഞ്ചാവും മയക്കുമരുന്നും ഈ പ്രദേശങ്ങളില് വ്യാപകമായി വില്പന നടക്കുകയാണ്. കൂടാതെ വാറ്റും അനധികൃത മദ്യവില്പനയും നടക്കുന്നുണ്ട്.
മദ്യവും കഞ്ചാവും പരസ്യമായി ഈ പ്രദേശങ്ങളില് ഇരുന്ന് ഉപയോഗിക്കുന്നവരാണ് രാത്രികാലങ്ങളില് കാര്ഷികോല്പന്നങ്ങളും, റബ്ബര് ഷീറ്റുകളുടെയും മോഷണം നടത്തുന്നത്. മോഷണ മുതലുകള് വില്പന നടത്താന് എത്തുന്ന അപരിചിതരെ വ്യാപാരികള് ശ്രദ്ധിക്കണമെന്ന് കര്ഷകരും പോലീസും മുന്നറിയിപ്പ് നല്കുന്നു. കര്ഷകര് പരാതി നല്കിയതിനെ തുടര്ന്ന് പോലീസ് മോഷണ സ്ഥലങ്ങളില് എത്തി മേല്നടപടികള് സ്വീകരിച്ച് അന്വേഷണം ആരംഭിച്ചു.
